معنديش الزهر
أجي نتا ولا نتي اللي كاتقرا هادشي، بغيت نسولك :
واش عندك الزهر ؟
بناء على تجربتك فهاد الحياة كل واحد فيكم غايقول ليا آه ولا لا ماعنديش و هو متيقن من الجواب ديالو اللي بناه على مجموعة ديال التجارب اللي راكمها في مدرسة الحياة، أنا اليوم غانقول ليكم بلي ماكاينش شي حاجة سميتها الزهر ولا الحظ و ماكاينش شي عامل فالكون اللي غايتحكم فالمواقف الحياتية ديالك من غير الافكار و التصرفات ديالك نتا !
ريتشارد وايزمان Richard Wiseman هو عالم نفس بريطاني دار دراسة طويلة المدة ديالها 10 سنوات على علم الحظ "The Science of Luck"، باش يدير هاد الدراسة دار إعلان فالجرائد : أي واحد كايعتابر راسو محظوظ بزاف أولا غير محظوظ يتصل بيه باش يشارك فالتجربة، فاللخر ريتشارد جمع 400 شخص كبار و صغار رجال و عيالات، فواحد التجربة عطاهم جرائد و قال ليهم حسبو ليا التصاور لي كاينين فالجريدة، الناس اللي كايشوفو راسهم ماعندهمش الزهر دوزو وقت طويل و هوما كايحسبو التصاور بمعدل جوج دقائق، بينما الناس "المحظوظين" دوزو ثواني قليلة فالبحث حيت شافو فالصفحة الثانية واحد الرسالة مكتوبة بخط كبير : "بلا ماتحسب را كاين 43 تصويرة فهاد الجريدة"، من هنا غاناخدو الاستنتاج الاول فمقارنة هاد جوج الانواع دالناس : الناس المحظوظين عندهم انفتاح على خاصيات جديدة بمعنى ماكايبقاوش غاديين فطريق اللي مرسومة ليهم من طرف النظام بل كايقلبو على طرق أخرى باش يوصلو للهدف، هادشي اللي كايخليهم أكثر نجاحا من الآخرين.
فواحد التجربة أخرى، ريتشارد وايزمان عطا للفريقين واحد السيناريو : "تخيل أنك نتا في بنكا و شويا دخلو الشفّارا و طلقو قرطاسة وحدة، هاديك القرطاسة جاتك في ايدك، واش كاتشوف راسك محظوظ ولا لا ؟" هادوك اللي كايشوفو راسهم منحوسين قالو بلي هاداك سوء حظ حيت من وسط بنكا واحدة من بين بزاف دالبانكات تسرقات هاديك اللي هوما فيها فهاداك الوقت و من وسط بزاف دالناس فهاديك البنكا هوما اللي جات فيهم القرطاسة و بالتالي النحس تابعهم فينما مشاو ... بينما الناس اللي كايشوفو راسهم محظوظين قالو أنهم عندهم الزهر حيت ماجاتهمش فشي بلاصة أخرى بحال الرأس، و كانو راضيين بالسيناريو اللي طاحو فيه حيت كان من الممكن تكون كفس ... هنا عاوتاني غانتلاحو لاستنتاج واحد آخر : الناس اللي كايشوفو راسهم محظوظين كايكونو متفائلين بالمستقبل ديالهم و ايلا وقع ليهم شي مشكل كايحاولو يتخيلو سيناريو كفس من هاداك المشكل باش يحافظو على الايجابية ديالهم هادشي لاش فينما تشوف شي واحد ناجح فحياتو ماتقولش : ولد الحرام ! عندوو الزهر، بل قول بلي هاداك السيد صنع الحظ ديالو بيديه !
من خلال تجارب ريتشارد وايزمان، هاد السيد خرج لينا 4 ديال الطرق باش تصنع الحظ ديالك :
1 - ماكايناش طريقة وحدة باش توصل للهدف ديالك، جرب كولشي و دير الطريقة اللي رتاحيتي فيها (واخا تكون طريقة بطيئة المهم توصل)
2 - باش توصل للهدف خاصك تنقي دماغك من الافكار العشوائية، ركز على شنو بغيتي و تبع الحدس ديالك
3 - توقع راسك غاتوصل لداكشي اللي بغيتيه، و لكن ماتنعسش و تسنى اللقمة تجيك لفمك سير قلب على راسك و خلي راسك إيجابي واخا تفشل مرة و جوج و ثلاثة ...
4 - منين توقع ليك شي كارثة، حاول تقنع راسك بلي كان ممكن يوقع لك كفس من هكاك و حفز راسك بلاصة ماتفقد الامل حيت تاواحد ماغايوقف معاك من غير راسك !
الحظ ماكاينش فالهوا و ماكاينش فالنهار اللي تزاديتي فيه، و ماكاينش في لون حوايجك، و ماكاينش فهاداك اللي كاتشوف كمّارتو كل الصباح، الحظ كاين فشخصيتك نتا، و نتا اللي كاتحكم فيه واش مزيان و لا خايب، و السلام.
تعليقات
إرسال تعليق