أشناهو الحب ؟ واش فعلا كاين شي حاجة اسميتها الحب؟ اشنو اللي كيخلينا نطيحو فالحب ؟
يقدر كلا واحد فينا يعطي تعريفه الخاص للحب ونقدروا نتافقو كاملين بلي هو إحساس عميق ...
بزاف فينا كيحسو فلحظة الحب بمجموعة من الأحاسيس مخلطة ومختالفة يعني ماشي إحساس واحد مبين الأمان والتوتر والخوف والرغبة في الشيء... وأيا واحد سولتيه مغيعطيكش تعريف دقيق ومفصل لاشنو هو الحب ومنين كيجي ماشي حقاش الحب شيحاجة اللي عميقة ومنقدروش نفهموها بل تقدر تكون شيحاجة اللي مكيناش وحنا صنعناها.
علماء التطور السلوكي كيقولو بلي جميع السلوكات البشرية بما فيها الحب كرغبة نابعة من جوج حوايج ضمان البقاء وإستمرار النسل الخاص. اللي تفرعو وعطاونا بزاف دالحوايج اوليين اللي هما الأكل والشرب والجماع والإجتماع والرغبة فالمؤوى اللي تفرعو وعطاونا بزاف دالحوايج تبناو ملي ولينا نعيشو كمجتمع أي تكرياو بفعل المجتمع كالسكن والقانون والحب والدين واللغة
اللي تفرعو وعطاونا كل مظاهر الحداثة اللي كنشوفو أي أن الحب في حد داته مابين الرجل والمرأة كان ضمان البقاء واستمرار النسل من بعد رغبة جنسية من بعد حب. أي من هاد الصيغة الحب تكريا بفعل المجتمع من أجل ممارسة الجنس وضمان البقاء واستمرار النسل.
من وجهة نظر علم النفس التحليلي الحب باختصار هو الرغبة المكبوثة عند الطفل للأم ديالو من بعد سيطرة الأب اللي من بعد كتظهر فالمراهقة والنضج. هادشي يقدر يجيك غريب وخا المصدر ديالو أكتر دماغ عبقري في مدرسة التحليل النفسي، دارو واحد التجربة كتأكد هدشي ولقاو فعلا ان الشخص الذكر كيميل لبعض الخواص الجسدية والسلوكية والإنطباعية عند الأنثى اللي تزوجها او تيبغيها اللي عندها تشابه مع نفس الأم. وفرويد براسو قال الحب مجرد نزوة جنسية وكل التبريرات هي مجرد تحايل الأنا على الأنا الأعلى لتحقيق غرائز الهو ...
من وجهة علم النفس بصفة عامة الحب كيتبنى بواحد الطريقة اللي كيأكد بلي أنه ماشي الحب اللي كنعرفوا. كيفاش؟ ملي كتشوف الشخص أول مرة كيعجبك بسبب عندو مجموعة من المقومات اللي نتا محتاجهم باش تخدم العنصرين الأساسين اللي قلنا فاللول اللي هما ضمان البقاء واستمرار النسل، الغريب أن هاد المسألة متغيراتش من العهد الحجري. مزال الأنثى تتميل للشخص القوي البنية اللي غادي يحميها من الوحوش واخا مبقاوش وحوش عندنا. اللي تطور هو ان الأنثى كتشوف هاد القوة اما فالعضلات او المال او السلطة يعني كاع كيمتلو ليها القوة والأمان. وأيضا في عدة تجارب على الرجال بينو بلي الرجل كيبغي المرأة دات الخصر والحوض المتسع (كينا ا دراري ولا مكيناش؟) وهدشي كيعطيه فاللاوعي ديالو أن هاد المرأة عندها حوض قادر على الإنجاب بشكل سليم و اللي كيأكد هدشي هو أنها طورات حسب المجتمعات فمثلا عند العرب كيعجبهم الغلض حقاش عاشو مجاعات فيما سبق وكتمتل ليهم المرأة الممتلئة أنها قادرة على الإنجاب فاللاوعي ديالهم. والغرب ولات كتمثل ليهم النحافة الصحة الجيدة لذلك ولاو كيبغيو النحافة دليل على ان المرأة في صحة جيدة للانجاب. نتجاوزو مرحلة الإعجاب ... ملي تأكدنا أنها مداخلش فيها لا حب لا والو.
ايلا بغيتي شيواحد فالغالب أنت كتبغي الشخص اللي بنيتيه فعقلك و اللي غالبا مكيشبهش لهاداك اللي كتبغي وهاد المسألة كنلاحظوها "ملي شي واحد " كينخل" شي وحدة " عاما كتزيد تبغيه واخا هو مقاصدش. علاش ؟ حقاش كتبقا تخيل فداك الشخص مرارا وتكرارا وخا ميكونش نخلها كتخيلو وفهاد التخيل كتخيل دكشي اللي باغا هيا فيه وكيفاش غيكونو بجوج لدرجة كتيقو وكتولي تعامل معاه كأنه هو داك الشخص اللي تخيلاتو لدرجة كتآمن بلي داك الشخص فيه دكشي اللي تخيلات. فهاد الحالة وخا معرت اش يدير غيبان ليها كيفما تخيلاتو. وهدشي غيلاحظوه ناس اللي كيعرفوهم بجوج وغتقوليهم( هذا هو الحب. كيبانلي فيه كلشي زوين) . وكيستغربو لخرين. هيا فقط تيقات دكشي اللي تخيلات فحال شي مونطو كيعجبها ملي كتشريه وكتقول من بعد واحد الشهر اش هدشي شريت او واش كنت كنلبس انا هاد لعجب (كينا البنات ولا مكيناش؟ ) . نفس الشيء وقع معاها كانت كتخيل راها زوينة وهيا لابساه. نفس الشيء بعد انتهاء العلاقة فقط بشكل أعمق كتقول واش هادا هو اللي كنت كنبغيه؟.باش تاكدي خودي ايا واحد كتبغيه وشوفيه بشكل محايد وركزي على السلوكات اللي دار معاك وماشي اللي قالك وشوفي واش دوك السلوكات كاملين كيمتلو داك الشخص اللي بنيتيه. غتلقاي فرق شاسع.
من الناحية البيولوجية hypothalamus كيفرز الدوبامين وكيعطيك واحد الاحساس بالنشوة والتحفيز ملي كتكون مع الشريك، وكينقص من إفراز السريتونين ملي كتفارق معا الشريك فالبديات مكيجيكش النعاس حقاش هاد جوج مواد كيساعدوك على النوم فالمراحل المتقدمة كيتفرز الأوكسيتوسين والڤزوبريسين اللي كيعطيو احساس بالارتباط القوي والانتماء لداك الشخص.
كينا واحد الحاجة سميتها الإدمان ماشي الحب وهادي كتوقع فالسوشيل ميديا (fac) بزاف وتقدر توقع حتا فالواقع. هو شي جوج كيكونو كيهضرو بزاف ودارت دراسة بينات ان العالم الافتراضي ماشي افتراضي كما كنظنوا لانه كيعطي بعض التفاعلات مثلا ملي كيوصلك مساج من واحد عزيز عليك وكتفرح. هاد الفرحة كتكون بافراز واحد المادة سميتها الاندروفين او هرمون السعادة. فحالة كتكون مولف تهضر معا شي واحد ديما ويوميا وفواحد لوقيتات بالضبط ولمدة طويلة نسبيا كيولي الجسم ديالك مولف واحد الجرعات ديال الاندروفين وكتولي مدمن بيولوجيا على داك الحوار. في حالة ايلا بدا كينقص تدريجيا مكيكونش ضرر ملحوض ولكن ملي كيتقطع brutalement مثلا كتخاصم معا داك الشخص فهاد الحالة غيسحابلك فعلا انك في حالة حب. ولكن انت فقط فحال شي مقطوع ديال كوكايين وغيوقعو ليك نفس الأعراض. غتحس بلي قلبك ضارك وبلي فيه لبراوات وغتضن ان الحب هذاك كيدمر فيك. وغتلقا صدرك من لداخل سخون ومخنوق كتكون حابس فيك النفس واعراض ديال تراكم تنائي اكسيد الكربون هاديك. وقدما بقيتي كتفكر فداك الشخص قدما كتجبد فالروابط النفسية اللي عندك معاه. مثلا شخص كظن انك كتبغيه كيكون عندك معاه روابط نفسية. اي هما مجموعة من الاشياء كيفكروك فواحد الاحساس عشتيه معاه. فاللحظة اللي كتشوف او كتسمع لشي موسيقا او كتشم شي ريحة كتفكر فيه حقاش ولات عندك فالذاكرة وكتحس بنفس الإحساس اللي حسيتيه معاه وكتفكر انه مبقاش كاين معاك. و ايلا بغيتي تخلص منهم فقط بعد من لحوايج اللي كيفكروك فيه.
مسألة كتشوف شيواحد كيعجبك وقلبك كيبدا يضرب بالجهد و النفس كتحبس وتقدر تعرق گاع او واخا تغيب غتجي عندي غنقولك ماشي حب، اذن اش كيوقع كتشوف الشخص بشكل واعي وكيطرا دكشي بشكل لا إرادي حقاش المسؤول عنه هو اللاوعي. وعلاش اللاوعي كيدير هدشي؟ اللاوعي كتكون قدامو واحد الحاجة اللي كتمتل ليه فرصة لضمان البقاء واستمرار النسل اي اعظم هدف عندو بطبيعة الحالة بسبب رغبتو انه يمتالكو او خوفو من انه يمشي ليه كيخليك تستاعد للمواجهة. كيفرز الادرينالين باش القلب يضرب بجهد ويوصل الدم للعضلات ويكونو على أهبة الإستعداد tachycardie par la stimulation de système sympathique الشيء اللي كيخلي العروقة يتزيرو vasoconstriction والمسالك التنفسية يتوسعو bronchodilatation باش تكون فقمة الإستعداد وكيعطيك احساس غريب وكتزاد درجة الحرارة ديالك وكتعرق وحتا الغدد ديال العرق كيفرزو افرازات عندها واحد الريحة محفزة للجماع ماشي للحب. وشي مرات كيفشلو رجليك هو فقط بفعل الحمض اللبني ماشي الحب.
فالحب مكينش حب غير مشروط يكذب عليك الكذاب.
فقط كاين الحب المشروط الواعي والحب المشروط الغير الواعي فراه حتا الأم اللي كتبغي ولدها ملي كترضع ولدها وتكبرو كتكون بشكل غريزي كتحافض على المورتات اللي نقلات ليه وضامنا لاستمرارهم والاب حتا هو كيخدم ويجيب لولادو وهوا مواعيش انا الطاقة اللي كتخليه حريص على هاد المسألة هيا الحفاض على استمرار الحليلات وهدشي كيفسر مبدأ الخيانة. الأمر اللي كيخليك متبغيش مراتك او حبيبتك تخونك ماشي هو الحب. الحب غير عدر كيعطيه الوعي باش يلقا سبب منطقي اكتر في حين ان السبب الرئيسي اللاواعي هو كتخاف يتخلطو الأمشاج وجيناتك ميستمروش وتبدا تحافض على استمرار جينات شخص اخر.
الحب التاني اللي أقل من اللول هو الحب المشروط الواعي يعني وحدا كتبغي واحد حقاش كيلبي مجموعة من المصالح والرغبات وحتا هو. و ايلا حيدو مكيبقاش حب وهذا هو اللي طاغي أكتر.
إيلا قدرتي أنك تمنع راسك من التخيل، تخيل احداث كتعلق بهداك اللي غتبغيه مغاديش تبغيه.
ماشي مكنآمنش بالحب ولكن كنآمن بالحب اللي شرحت دابا وماشي اللي فالأفلام وبهادشي اللي شرحت كيبقا شيحاجة اللي زوينا .
كاين بزاف ميتقال ولكن بما أنك قريتي حتا لهنا بغيتك تعرف اهم حاجة كتبين بلي مكاينش الحب هو ايلا درنا التنويم المغناطيسي لشي جوج كيبغيو بعضياتهم كيتسطاو على بعضياتهم وقلتي ليهم مغتعرفوش بعضياتهم وملي كيحلو عينيهم فعلا مكيعرفوش بعضياتهم. حتا كيخرجو من هاد لايطا.
تعليقات
إرسال تعليق