علاش كنشرفوا
إيلا كان عندك الإختيار فشحال بغيتي تعيش، شحال غادي تختار 60 عام، 70 عام، ولااا مثلا 1000عام ؟
نطرح عليك السؤال بطريقة أخرى، إيمتا بغيتي تموت ؟
دابا وقف لقرايا ،فكر فالجواب شوية عاد كمل …
دابا نخليو هاد السؤال تال من بعد و ناقشوه، و تخيل معايا كون كنا بحال الشخصيات اللي ف فيلم “In time” كيوصلو 25عام و كايتفيكساو فيها ، كيبقاو زوينين، و لحمهم خااالي من التجاعيد، مكيضروهمش الركابي، مكاينقص ليهم لا شوف ، لا سمع، لا ذاكرة،لا مناعة، يعني كولشي خداام و بالتااالي مكايموتوش إلا بشي سبب خارجي.
و لكن ضووووماج حنا ماشي بحالهم ، حيتاش حنا كنشرفو… ولكن شنو كتعني كنشرفوا و شنو كيطرا فالجسم ديالنا ؟؟؟
أول حاجة خاصكم تعرفوها هي أن الساعة البيولوجية ديالنا ميمكنش تخدم للأبد يعني، حنا غنموتوا غنموتوووا.
دابا ندوزوا للجسم ديالنا، باش نفهموا شنو كيطرا فيه، خاصنا نعرفوا بلي كيتكون من بزاااااااااف ديال الخلايا اللي كتجدد ( واااااايلي و ملي كتجدد علاش كنشرفوا علاش مانبقاوش تا حنا شباااب)
الفكرة هيا أنه هاد الخلايا باش تتجدد، كدير واحد العملية كتسمى “عملية الإنقسام الخلوي” ،فكل مرة كيتقسموا فيها الخلايا كيديرو واحد فوطوكوبي ديال ADN ولا الحمض النووي، اللي كيكون مجموع فشي هياكل كنسميوهم الكروموزومات على شكل X، و اللي فايت قرينا عليهم فالباك، و عرفنا بلي الإنسان عندو 23 زوج منها، المشكل هو أن هاد فوطوكوبيات ديال الحمض النووي طويلة لدرجة كتفوت الأطراف ديال الصبغيات، و بالتالي كاين خطر أنها تتقطع، و باش متقطعش كاينة واحد اللعيبة كتسمى “التيلومير”(التيلوميرات ما هما إلا أجزاء من الحمض النووي مكررة معندها تا معنى) موجودة فالأطراف ديال الكروموسوم هي اللي كتحميها.
دبا من هاد الهدرة كوووووولها،; كل مرة كتم عملية الإنقسام الخلوي، هاد التيلوميرات كتقصار كثر و كثر يعني كيبانوا علامات التقدم فالسن كثر و كثر ، حتا كاتوصل واحد الوقيتة كاتحيد كلها، و مكايبقااوش إتجددوا لينا الخلايا .
دابا فإطار أضف إلى معلوماتك، ماشي غير ويل سلاس و سيلفيا و قبيلتهم اللي مكيشرفوش ( الشخصيات ديال “In time”) ، و لكن حتا واحد "الكائن" وحيد الخلية سميتو Tetrahymena قادر يجدد التيلوميرات ديولو للأبد، إيلا كنتوا فهمتوا الهضرة اللي قلت قبل على الإنقسام الخلوي و التيلومير، غتقولوا دابا إذن هاد Tetrahymena مكتموتش.
و هنااااااا بضبط ركزوا معايا مزيان، هاد Tetrahymena واخا مكتشرفش و لكن كتعرض لبزاااف ديال الأمراض.
هادشي غيرجعنا للسؤال اللي طرحت فاللول، إيلا شي نهار ختارعو شي حاجة اللي غتزيد لينا فسنوات ديال العيش و ولاو التيلوميرات عندنا كيتجددو بشكل لا نهائي ، وأنزيم التيلوميراز غي كيتشتت شنو غادي تختار؟ هادشي كايفكرني فواحد الشخصية ف “In time” سميتوا ‘هنري’ عاش كثر من 1000عام و كان فالمخزون ديالو 1000عام أخرى إقدر يعيشها إلا بغا، ولكن هو ختار إنهي حياتوا غاتقوليا أرى ليا ديك 1000 عام أنا بغيتها مكاين تا سبب باش نهي حياتي.
غنقول ليك نوض على سلامتك، حنا ف ريل لايف عزيز(ت)ي القارئ(ة)، ماشي ف ‘In time’، حنا فالحقيقة ماكنموتوش حيتاش كنشرفوا، ولكن كنموتوا حيتاش كنعياو، و كيكثروا علينا الأمراض،”” كلما زادوا السنوات ديال العيش ديالك كلما زادت نسبة تعرضك للأمراض” (فهمتي لبلان!)
و كيما لقيت فواحد ل Quote ف gulu gulu
“Death is not the opposite of life but a part of it”
{ Haruki Murakami }
زعما الموت ماشي العكس ديال الحياة ولكن جزء منها و فالأخير ،حنا غنشرفو غنشرفو، ولكن باش مانشرفوش قبل الوقت ،خاصنا نحافظوا علا الصحة البدنية و النفسية، بالأكل الصحي، و الرياضة، و نعيشوا فمحيط نقي و نخالطوا ناس متفائلين.
تعليقات
إرسال تعليق