كلنا كنعرفو شي شخص ذكي من الناحية العقلية و مستواه التعليمي الأكاديمي عالي ولكن للاسف فاشل فحياتو العملية أو في علاقاتو مع اللي دايرين بيه، ممكن تكون تلاقيتي مع بحالو ولا تقدر تكون نتا نيت كينطبق عليك هادشي، ولكن معرفتيش تحدد المشكل فين بالضبط.
فأغلب الأحوال هادشي كيكون راجع لقلة الذكاء الاجتماعي عند الشخص.
أشنو هو الذكاء الاجتماعي وكيفاش نقدر نطورو؟
الذكاء الاجتماعي هو القدرة ديالك على تكوين علاقات ناجحة مع الناس اللي دايرين بيك فالخدمة ولا مع صحابك،
الأغلبية ديالنا كيقيم ذكاء الشخص بمستواه التعليمي فين وصلتي فالقراية و أشمن مهنة فاش خدام، ولكن معظم الخبراء أكدو بأن النجاح فالحياة الشخصية أو المهنية 20% فيها راجع للذكاء المعرفي IQ ، والباقي 80% راجع للذكاء الاجتماعي للشخص، وطريقة تكوينو للعلاقات و التعامل معاها، مثال: عندنا طبيب معروف وحاصل على درجات علمية عالية و متمكن في مجال عمله، ولكن أغلبية المرضى ديالو كيتشكاو من قلت كفاءتو، ملي سولو المرضى علاش كان الجواب مكانش عندو علاقة بسوء تشخيص او دواء غلط، الجواب كان في طريقة المعاملة ديالو مكيعطيش الوقت مزيان، ديما مخنزر، مكيحاولش يشرح بلغة مفهومة وينزل للمستوى المعرفي ديالهم، كيعرف غير يفحص ويعطي الدوا.
وفالجانب الاخر كاين طبيب على قدر اقل من المعرفة ولكن كتلقاه شخص محبوب وديما الناس كيمشيو عندو ملي سولو علاش لقاو بلي ديما كيستقبلهم بالابتسامة والترحاب، كيعقل على الحالات اللي متبعين معاه وكيعطيهم الوقت الكافي باش يسمع ليهم،وكيشرح بلغة مبسطة، المشكل ديال الطبيب الاول معرفش يترجم الذكاء ديالو العلمي او العقلي لأرض الواقع، هذا المثل كينطبق على بزاف ديال الناس، استاذ معرفش يوصل العلم ديالو لتلامذو، لزوج معرفش يعبر على الحب ديالو لمارتو، للموظف فالادارة كيحاول يدافع كثر ميفهم طبيعة المشكل .
Social intelligence في كتابو Daniel Goleman شرح بلي العامل الوراثي عامل مساعد في الذكاء الاجتماعي ولكن ماشي هو كلشي كاين اللي كابر فبيئة كتعاونو و كتزيد قابلية يكون مقبول اجتماعيا وكاين العكس، وكيقول على أن الذكاء الاجتماعي فالأول و فالاخير مهارة و سلوك يمكن اكتسابو. شنو خاص ندير باش نطور من ذكائي الاجتماعي؟
1- فكر بعقلية الاخر، متسرعش فالحكم ديالك على أي حاجة و متحكمش حتى تشوف بعينيك و تتأكد ، والدليل كلنا عندنا شي صديق عزيز نهار شفناه النهار الاول محملناهش وقلنا متكبر وفيه العياقة... و فالاخير صدق من اقرب الاصدقاء لينا.
2- تكون مستمع جيد، وتحاول تسمع ومتقطعش الشخص لكيتكلم و تحافظ على التواصل البصري و متسرعش فاعطاء الحلول.
في إعطاء الحلول يمكن ليك تعتمد على طريقة solution focused brief therapy وهذه تقنية مستخدمة من علماء النفس لمحاولة حل مشاكل بعض مرضاهم عن طريق الأسئلة اللي عن طريقها غادي توجهو للحل المناسب ليه هو ، حيت كيفما قال الكاتب stephen Covey ، ماشي من المنطقي انك تعطي نظاظرك ديال الشوف لشي حد يشوف بيهم حسن منك ، وهذا معناه ان تفكيرك في حل مشاكل الغير كيكون متأثر بطرق حل مشاكلك انت ماشي هو.
3- راجع نفسك، عملية تعلم اي حاجة بحال شي دائرة كتبدا بالخطأ و ملاحظة الخطأ وعاد طريقة تصحيحو، حاول تقيم الأفعال و ردود الأفعال ديالك مع الناس وحاول تعلم منها اليوم خطأت غدا حاول تقاد...
4- تعلم كيفاش تنتقد، الطريقة ديال الانتقاد مهمة جدا في بناء العلاقة الاجتماعية، كلنا عندنا ذاك الشخص لمكيراعيش للمشاعر مع يشوفك يقول ليك ضعافيتي، غلاضيتي، مزال متزوجتيش اش كتسنا...أول حاجة خاص ديرها هي تبعد على الهضرة اللي كتنفر الناس منك و النقد ديالك ميكونش هدام، ليمكيعطيش حتى قيمة للشخص لكتنتقدو...ديما حاول تركز على أنك تنتقد الفعل او الخطأ ماشي الشخص وعطي وجهة نظرك بطريقة مقبولة بدون متنقص منو، وأهم حاجة يكون الانتقاد وجها لوجه بعيدا عن مواقع التواصل الاجتماعي و ماشي قدام الناس..
أي علاقة عندها طرفين، حاول تخدم من الجانب ديالك و غادي تشوف النتيجة...
تعليقات
إرسال تعليق