السرطان
بزاف دالناس كايعرفو شنو هوما الاسباب الرئيسية للاصابة بالسرطان بحال العامل الوراثي، الاورام، التقدم فالعمر، التعرض للمواد المسرطنة ... و لكن كاين بزاف ديال النظريات و المفاهيم اللي بزاف دالناس مازال كايغلطو فيها و كايعتابروها صحيحة حول هاد الدّاء، فهاد المقال هادا غانقولو ليكم شنو هوما هاد المفاهيم الخاطئة و غانحاولو نصححوها بناء على إجابات الباحثين فالمعهد الوطني للسرطان في الولايات المتحدة الامريكية و بناء على الدراسات اللي تدارو في السنين الماضية.
واش الكونسير كايقتل ؟
واش فخباركم بلي أقل من 10 فالمية دالناس اللي مراض بالسرطان هوما اللي كايموتو بينما الناس اللي كاينجحو فالتغلب عليه كتر من 90 فالمائة فبعض أنواع السرطان : "سرطان الثدي" و "سرطان البروستات" و "سرطان الغدة الدرقية"، بينما فالمتوسط ديال جميع انواع السرطان، %66 دالناس كايقدرو يعيشو و يتغلبو على مرض السرطان ...
هاد المعدلات مأخوذة من بزاف دالناس و مبنية على بزاف دالعوامل بحال "نوع السرطان، ايمتا تكتشف المرض، شحال غايعيش المريض، شحال منتشر فالجسم ..." اذن فهاد الحالات، ممكن نقولو بلي السرطان ماكايقتلش .. دائما و لكن فالبلدان اللي متأخرة فالميدان الطبي بحال المغرب، ممكن تنقص هاد النسبة دالنجاة.
واش المأكولات السكرية و الصناعية كاتزيد من الخطورة دالمرض ؟
بالنسبة للمأكولات اللي فيهم السكر الجواب هو "لا"، حنا عارفين بلي الخلايا السرطانية كايتغذاو على سكر الغليكوز بشكل رئيسي كتر من الخلايا العادية، و لكن الامتناع على أكل السكر غايمنع الخلايا من التكاثر و فنفس الوقت تناول السكر ماكايعنيش أن السرطان غايزيد ينتشر.
✅تنبيه :
{ اتباع نظام غذائي عالي السكر كايساهم فزيادة الوزن، و كاترتبط السمنة بالاصابة ببزاف دالانواع دالسرطان.
كاتعرفو هاد المحليات الصناعية بحال اللي كايكونو في كوفيتير ولا هاداك اللي كايديروه الناس اللي فيهم السكر "الساكارين، النيوتام، السيكرالوز، الاسيلفام بوتاسيوم، و السيكلامات .."، هادو ماكاين عليهم تا شي دليل بلي كايسببو السرطان، و الميريكان سمحت ببيع المنتجات اللي فيها هاد المواد باستثناء السيكلامات Cyclamate. }
واش السرطان كايعدي ؟
السرطان بشكل عام مرض غير معدي بمعنى لا سلمتي على شي واحد مريض ولا عنقتيه ... ، المرض ماكينتقلش، و الحالة الوحيدة اللي ممكن ينتقل فيها المرض من واحد لواحد هي لا تمت عملية زرع أنسجة ولا أعضاء شخص مريض لشخص صحيح و تا هاد الحالة نادرة بحيث نسب حصولها هي أقل من 1%.
واش الاحباط كاينقص من آمال الشفاء من السرطان ؟
ماكاينش دليل علمي مقنع كايربط السلوكيات الايجابية/السلبية بالمرض، بينما الاختلاف اللي كاين بين هاداك اللي مريض و هاداك اللي صحيح، هو هاداك اللي صحيح كايحافظ على الروابط الاجتماعية ديالو، و النشاط البدني و الدعم العاطفي كايحفزو الشخص على مقاومة المرض، بحيث داك الشخص كايولي عندو حافز باش يدير هادوك الحصص المؤلمة ديال العلاج الكيميائي و العلاج بالاشعة ...
واش تعريض الخلايا للهواء كايزيد من انتشار المرض ؟
الجواب هو "لا"، الهواء ماغايخليش الخلايا تنتشر بسرعة، و ماغايخليش المرض يمشي من جزء فالجسم لجزء آخر.
واش البورطابل كايسبب الكونسير ؟
الجواب عاوتاني هو لا، الكونسير كايحصل بسبب طفرات وراثية، الهاتف النقال كاينتج طاقة ذات تردد منخفض ماكاتقدرش تحدث أضرار على مستوى المورثات ديال الانسان.
واش مزيل العرق "Déodorant" كايسبب سرطان الثدي ؟
الجواب هو لا، أحسن الدراسات اللي كاينين دابا كايقولو بلي ماكيناش علاقة ديال المواد الكيميائية اللي فمزيلات العرق مع تغير أنسجة الثدي، الشيء اللي كايسبب السرطان.
ملحوظة : المقال مترجم بتصرف عن موقع المعهد الامريكي للسرطان .
تعليقات
إرسال تعليق