اليوم غادي نهضرو على واحد الإشكال اللي مخربقنا كاملين اللي هو العكز. ولكن قبل مانهضرو على كيفاش نحيدو هاد البلان خاصنا نعرفو علاش كنعكزو و بلا ما يجي شي واحد يقول ليا التابعة ولا النحس يقوليا شي واحد شي لعيبة بحال هاكا غادي نخلطو ههه ! المهم ملي كانبغيو نديرو شي حاجة ديما تتكون راشقا لينا ولا تتكون Motivation باش نوضو نديروها، الموتيفاسيون مزيانة ولكن Motivation كتمشي وكتجي تقدر تفرج ف فيديو بالليل وتجعر وتقول غدا انفيق ف الصباح انمشي لاصال غندير اندوش انبريباري انقرا كتاب تا را كتحس براسك واعر Iron man مثلا ! غير كتفيق في الصباح كتنوض مدمر كتقول تامالي على هادشي وصافي خليها تال غدا وكيجي غدا و مكدير والو باش تبقى تأجل بحال هاكا.
باش تفهموا مزيان علاش كنعكزو خصنا نفهمو دماغنا كيفاش كيخدم وركزوا معايا مزيااان، دماغنا مصمم بواحد الطريقة فشكل باش يحمينا داكشي علاش ديما كي بغينا نبقاو في Comfort zone او منطقة الامان، الوقيتة اللي كتبغي تنوض دير فيها شي حاجة فيها Challenge اللي هي بحال تنوض تبريباري اولا دير شي حاجة جديدة اولا تمشي لاصال دماغك كيعرفك باغي تدير مجهود وغادي يبدا يطلع ليك كاع دوك البلانات اللي نتا كاترتاح فيهم وكيعجبك الحال ديرهم حيت كيبغى يخليك فهاديك Comfort zone وكيبقى عليك و تا ريح شمن بريبارسيون وخليها تال العشية ملي تمشي الدار عاد قرا اولا كنتي ف الدار غادي يقوليك و تا رتاح حتى تمشي لكافي و تلاقا العشران عاد قرا اولا متلا ملي كتبغي تريني دماغك كيبدا عليك و تا صافي هانية جبد عليها اليوما تال غدا وتريني را مازال الحال دابا البلان الخطير انك الى تحديتيه ونضتي باش دير ديك الحاجة اللي مبغاكش ديرها فاللول كيزيد معاك مستوى التحدي حتى هو، وكيبدا يخلق ليك اعذار بحال دابا متلا بغيتي تريني وكيبدا يقولو ليك وتا را الى بغيتي تريني را خاصك Program و الوقت و الفلوس و بلا بلا بلا... صافي كيعكزك هادشي كامل باش يرجعك ل Comfort zone.
و الخايبة هي ايلا عكزتي على شي حاجة و ما درتيهاش كيبقى فيك الحال وهذا ما يصطلح عليه ب Zeingarnik Effect بمعنى انك ايلا بديتي شي حاجة و ما كملتيهاش كتحس بواحد عدم الراحة و دماغك كيبقى يدير ليك الطيارة حتى تكملها و مكتحملش راسك و شوية بشوية مكتبقاش تيق فراسك. هادي من ناحية و من ناحية اخرى دماغنا كيبغي المكافأة اللحظية انا نشرح ليكم البلان بحالاش دبا الى قلت ليك غتاخد مية درهم دابا و ميتين درهم من دابا عام تا واحد ما غايعطل ديك مية درهم تا را بالخفة غاطير اما ايلا قلت ليكم مية درهم دبا و ميتين درهم بعد غدا الاغلبية غادي يقول ليا مالبوها نصبرو نهار وناخدوها ماشي مشكل حيت دماغنا عارفنا غناخدو ميتين درهم في وقت قريب وغادي يعجبنا الحال المشكلة هي ملي كتكون حياتنا هي ديك ميتين درهم حيت ديما كنأجلو نعيشو كما بغينا وديما كنتخيلو راه من هنا لقدام غنوصلو لكاع داكشي لي كنحلمو بيه بحال اللي كيبريباري L'exam و عارف راسو غيعجبو الحال ملي ينجح ولكن باش يدير واحد المجهود كيبقى يأجل تال الدقيقة تسعين عاد كيبقا يضارب باش يجيب التعادل.
البلان ديال القراية اللي شوية كيعاون انه كاين Deadline (الموعد النهائي) عارف عندك واحد الوقت بزز منك اتنوض دير داكشي اللي خصو يدار اما الحوايج لي ممحكومينش ب Deadline بحال لاصال اولا اي changement باغي دير فحياتك باش تولي مزيان هنا لواحد كيبقا يعكز ويتسنى حيت هاداك الشعور الزوين اللي غادي يحس بيه ملي يحقق داكشي اللي باغي يحقق باقي بعيد. متلا ملي دخل لاصال عارف ايعجبو الحال ملي تولي عندو فورمة زوينة وصحتو مزيانة مي باقي بعيد هاد البلان الوغ شنو كيدير كيبقا يعكز يعكز يعكز... والبلان الخطير ان دماغنا فاش كيدير شي حاجة و كيستمتع بها كايفرز Depamine و ملي دماغك كيفرز الدوبامين كنبقاو نعاودوا نفس البلان حتى كيطلع لينا فراسنا بحال ملي كتعجبك شي اغنية فاللول كتبقى تعاود واحد الوقيتة كطلع ليك فراسك. دبا ملي دوينا على الأسباب لي كيخليونا نعكزو و نأجلو، شنو نقدرو نديرو باش نحيدو هاد العكز ديال والو تا راه كيعصبني هاد العكز نااري !!
آجي نوريكم contre attaque الضربة القاضية باش تحيد هاد البلان كامل غندويو على ستة ديال التقنيات ...
✅ الطريقة الاولى
هي اللي دوات عليها واحد خيتي سميتها mel robbins فكتابها the 5 second rule او قاعدة الخمس ثواني البرانسيب هو اننا ملي كنبغيو نديرو شي حاجة عندنا واحد البوابة ديال خمسة ثواني باش اننا نديرو l'action سينن دماغنا غادي بدا يلعب علينا ويبدا يخلق لينا في الآعذار والأسباب اللي دوينا عليهم فاللول اذن ملي تبدا تحس براسك باغي دير شي حاجة غادي تحسب خمسة اربعة ثلاثة جوج واحد و غادي تنوض دير ديك الحاجة اللي خصها دار مثلا الصباح الى بغيتي تنوض و ماقادش غادي تحسب خمسة اربعة ثلاثة جوج واحد و غتنوض، باغي تنوض تحفظ غتقول خمسة اربعة تلاتة جوج واحد "إنهض" باغي تمشي لاصال غتحسب خمسة اربعة ثلاثة جوج واحد bingo تكَعد لارض نوض سير دبا لاصال.
البلان كيفاش ؟! هو اننا فاش كنبغيو نبداو نعكزو دماغنا كيمشي لواحد البلاصة سميتها basal ganglia هي اللي مسؤولة على العادات بلا ما ندخل في التفاصيل بزاف باش ما ندوخكمش، المهم ملي كنبداو نحسبو بالمقلوب دماغنا كيتريفريشا وكيرجع ل prefrontal cortex و هي البلاصة اللي مسؤولة على اتخاذ القرارات او هي اللي كتخليك متعكزش و تنوض دير داكشي اللي خصو دار.
✅ الطريقة الثانية
هي نقسمو اي خدمة كبيرة للاجزاء صغيرة، نفكركم ان دماغنا فاش كنبغيو نديرو شي حاجة وكيعرف انها كتطلب مجهود وكيتخيلها كبيرة كيبدا يخلق لينا فالأعذار وكيقولك وا غي خمسة دقايق وغتبدا هادشي باش يخليك تعكز، ولكن ايلا قسمنا اي خدمة كما بغات تكون غادي نقدرو نتغلبو عليها، مثلا ايلا عندك امتحانات فعشرة ديال المواد منين تبدا غادي تركز على وحدة وغادي تنسا لاخرين وهاديك الوحدة فيها عشرة ديال les chapitres حتى هما غادي تقسمهم وغادي دير ليهم وقت و تمشي وحدة بوحدة بحال هكا تقدر تتغلب على preparation و ماغيبانش ليك داكشي كثير وصعيب، هادشي يقدر نطبقوه على اي حاجة خدمة سبور... اللي كان.
✅ الطريقة التالتة
هي ملي تبغي تخدم شي حاجة غادي تقسم وقتك بحال هاكا غادي تقول خمسة وعشرين دقيقة خدمة ديال الصح ماكاينش الضحك ديال التركيز التام، و خمسة الدقايق راحة مثلا عندي خدمة وعارف غتاخد ليا ربعة دسوايع ولا كتر ايلا فكرت انني خاصني نخدم ربعة دسوايع غادي نعكز راسي قبل منبدا ولكن ملي كنقول غادي نخدم خمسة و عشرين دقيقة و نرتاح خمسة دقايق غنخدم خمسة وعشرين دقيقة و نرتاح خمسة دقايق... غادي تزاد الانتاجية ديالنا او غادي نخدمو مرتاحين ومع الوقت تقدرو تزيدو مدة ديال الخدمة و تقدر توصل حتى ستين دقيقة خدمة و خمسطاشر دقيقة راحة.
✅ الطريقة الرابعة
ملي تحس براسك عكزتي على شي حاجة قول عكزنا عكزنا وا اجي نخدم غا واحد خمسة الدقايق حتى من بعد ونكمل و غير تخدم ديك خمسة دقايق اللي غادي تجيك ساهلة غادي تلقى راسك وسط الخدمة وماغاديش تحس بالوقت تقدر تجيكم هاد الطريقة ساهلة و لكن راها فعالة.
✅ الطريقة الخامسة
حنا اللي كنبداو نأجلو اولا نعكزو كيبداو طيحو علينا شي افكار فشكل بحال وا اجي نضرب طليلا فالفيسبوك اولا الواتساب نشوف واش كاين شي مساج ولا شي كومونطير ولا عنداك تنسا البلان ديال اليوما، واش مازال ما جبتيش الدراري يلعبو راه كاين التيران،اجي خاصك تعيط لخونا باش ماينساش وزيد وزيد... فاش يبداو ايطيحو عليك بحال هاد الأفكار، فهاد اللحظة غتجيب ورقة وخليها حداك فما طيح عليك شي حاجة بحال هكا كتبها وخليها ودير فبالك غادي نرجع ليها من بعد، بحال هاكا غادي تهنى وغادي تخويه من شحال من فكرة غادا تكون مبرزطاك.
✅ الطريقة السادسة
خدمو ب to do list حيت اخيب حاجة هي تنوض فالصباح ماعارفش اليوم شنو خاصك دير و باش متعكزوش وتكونو بروديكتيف to do list ديالكم خدمو بها ديما فالليل و كتبو داكشي اللي غادي ديرو الغد ليه وديما بداو الاهداف الصغيرة مثلا ملي نفيق غادي نشرب الماء حيت كنساه غادي نجمع بلاصتي... ساهلة وبالرجولة ملي تفيق غادير هادشي تكتبو فورقة و مع الوقت غتولي شوية بشوية قادر دير ما كتر، و to do list كتبوها فوريقا اولا notebook صغيرة ديما تكون معكم وفيما دير شي حاجة سير ل to do list و ضرب عليها بحال هاكا غادي تحس براسك قادر تجيري وغادي تزادك الثقة بالنفس.
مثلا باغي تبدا بروغرام ديال traction فالدار قول غدا غادي نفيق غندير خمسة ماشي عشرين حيت ايلا غدير عشرين و مادرتيهاش دماغك غادي يولي اخوي بيك، ماغايعجبكش الحال ومغاتبقاش تايق فراسك اذن قول غادي نبدا من خمسة حتى توصل لعشرين و تفوتها وهادو بعض الطرق باش انكم تحيدو العكز، واهم حاجة اللي نقدر نقول ليكم هي la discipline بمعنى دير داكشي اللي خصو يدار واخا تكون كاعي مريض مراشقاش ليك... ماسوقيش خاص تكون عندك mindset ديال عسكري كيما قلت ليكم Motivation زوينة ولكن ما تعولوش عليها را كتمشي وكتجي كونو عسكر في دماغكم زيرو ريوسكم حيت اخيب حاجة هي ملي تقول من هنا خمس سنين غادي نوصل لواحد الهدف معين وغادوز خمس سنين ماغاتوصلش وغتلقاك مازال غارق فنفس الهضرة والمشكلة هادشي اللي كيوقع الأغلبية ديال الناس كاين اللي كيقول ليك من دابا خمس سنين غادي نولي واعر فالديزاين اولا ندير بروجي ديالي وندخل منو اللعاقة وديما كيتسناو شي حاجة من السماء توقع وهادشي كامل مغاديش اتحقق ايلا ماخديتيش القرار هاديك الساعة ونضتي درتي الخدمة اللي خاصها دار عمرك مغادي توصل متعكزوش متعطلوش بداو.
مزيان واحد يحلم كبير ولكن ايلا مكانش الحلم قد les actions ديالو اللي كيدير باش يوصل راه عمرو ما غادي يوصل و اهم حاجة غادي نقول لكم كل واحد فينا حنا كاملين عندو قدرات يقدر ادير العجب و يعاون l'entourage ديالو و يوصل اي حاجة باغي يوصلها خاص غير تجمع بين تحلم تخطط ودير حيت كلشي على l'action متبقاش تعطل العكز معدنا منديرو بيه واخيرا غانقوليكم اللي عجبو هاد المقال يبارطاجيه مع الاصدقاء ديالو و اللي كيعرف شي معكاز يطاكِيه هادي اسهل حاجة ممكن ديروها متعكزوش عليها حتى هي هههه.
تعليقات
إرسال تعليق