متلازمة عبقري Savant Syndrome
و دبا كيفاش البلان ديال هاد Savant Syndrome ولا متلازمة العبقري؟ وخا اسيدي انا غادي نشرح ليك، انهضروا على جوج دالحالات اللولة هي فاش كتكون المتلازمة فطرية ولا وراثية كتزاد مع بنادم من الصغر، و الثانية هي فاش كتكون المتلازمة مكتسبة. نبداو باللولة لي كتكون فطرية
و هنا غندويو على واحد السيد سميتو Kim Pick لي تحولات القصة ديالو لفيلم هوليوودي سميتو "Rain Man" خرج للقاعات السينمائية في 1988، هاد السيد هادا كان كيمتالك قدرات عقلية استثنائية، تخايل معايا كان كيقرا جوج دالصفحات متقابلين في دقة وحدة، يعني كيقرا صفحة بالعين اليمنى و الصفحة الأخرى بالعين اليسرى و هادشي كيديرو فمدة ديال 3 تال 8 الثواني، و نزيدك داكشي لي قراه كيحفظو و يقدر يعرضو عليك في ديك ساع! فاش وصل ل 57 عام حفظ كتر من ستالاف كتاب، و بالإضافة لهادشي كامل و الذاكرة القوية لي عندو، السيد قدر يحفظ الجغرافيا ديال مريكان كاملة بالرموز و الزناقي ديال كل مدينة! وصل لواحد الدرجة انه قادر يعقل على اي حاجة حفظها و شافها، و الحاجة لي سالات معايا في هدشي كامل هو أنك إلا شديتي شي حفنة ديال الزرع و شتتيها ليه في الأرض، يمكن ليه يعطيك شحال من حبة كاينة و بالتدقيق و هادشي في مدة ماكتفوتش ثانية وحدة... تا خليني من هنيني! السيد واعر لدرجة انهم عتابروه مرجع مهم في التاريخ و الجغرافيا و الموسيقى ... و هادشي كامل بطبيعة الحال غير مكتسب و إنما تزاد بيه من الصغر و هو من المرضى المصابين بالتوحد.
الحالة التانية هي فاش كتكون المتلازمة مكتسبة و هنا غندويو على واحد السيد سميتو Jason Padgett لي وقعات ليه واحد الحادثة في 2002 قلبت ليه حياتو سفاها على علاها ... و بين ليلة و ضحاها Jason Padgett غادي يولي عبقري و تغيرات حياتو 360 درجة. اشنو وقع لهاد السيد؟ واحد النهار كان غادي فالطريق ما بيه ما عليه ... حتى تعرضوا ليه الشفارة داو ليه كَاع داكشي لي يكسابو و باش زادوا كملو عليه عطاوه طريحة ديال العصى، بقاو كيضربو فيه حتى فقد الوعي ديالو. فاش داوه لسبيطار و كشفوا عليه الاطباء لقاو عندو ارتجاج فالمخ ... و من بعد ما دارو خدمتهم و صح، فاش رجع للحياة ديالو الطبيعية لقى راسو كيغسل ايديه عشرين مرة في نص ساعة و ملي كيمشي ينعس كيلقى راسو نعس تلاتة ايام متابعة ... و بدا كيشوف التفاصيل ديال اي حاجة كتحرك ب Slow motion، يعني ولات عندو القدرة انه يشوف التفاصيل ديال التفاصيل! وصلات بيه الحالة حتى ولا كيدير شي حوايج ميقدرش انسان عادي اديرهم، و من بعد لقى راسو عبقري في الرياضيات و يقدر ادير اي عملية حسابية بلا ما يستعمل Calculatrice! آش هادشي واش انا باقي كنحلم ولا شنو؟!
دبا ملي فهمنا الكونسيبت ديال متلازمة العبقري آجي نشوفو واش هادشي بصح ولا لا؟ فاش قلبت و بحث مزيان لقيت بلي الموضوع كبير بزاف ... و دبا اندخلو المعقول، قاليك آ سيدي كاين واحد النوع من Savant Syndrome سميتو Autistic Savant Syndrome نسبة للتوحد لي هو "Autism" و كاين نوع آخر سميتو Asperger's Syndrome و النوع التالت هو Savant Syndrome يعني هادشي فيه مراحل على حسب الاصابة لي تقدر توقع لأي واحد و يلقى راسو حتى هو تصاب ب Savant Syndrome.
و آجي دبا نفهمو وحدة بوحدة، العلماء اكتاشفو ان كل عشرة مصابين بالتوحد كتلقى واحد فيهم هو لي كيتميز بقدرات خارقة ولا موهبة كتفوق التوقعات! و لكن بالرغم من هاد القدرات كاملة لي كيمتازوا بيها مرضى التوحد الا انهم ماكيقدروش اعتامدو على ريوسهم في الحياة اليومية ديالهم. أما النوع التاني و لي كتكون عندهم هاد المتلازمة مكتسبة، كيفما قلنا فاللول هوما كيوليو عباقرة بسبب حادث وقع ليهم و تسبب في ارتجاج في المخ، هادشي لي خلاهم يتحولو من ناس عاديين للعباقرة و هدشي لي وقع ل Jason Padgget و لواحد السيد آخر سميتو Orlando Serrel و هادا كان كيلعب Baseball مع العشران ديالو ... حتى جات ليه الكرة في راسو و دماغه عطاه صداع... من تما هزوه داوه للدارو ... هنا غاتوقع واحد المفاجأة من العيار الثقيل، السيد فاق لقى راسو عندو موهبة سميتها Calendar calculating او ما يسمى الحساب التقويمي، كفاش؟ يعني يقدر يقوليك من هنا ل 65 يوم اشمن نهار في الأسبوع و اشمن نهار فالشهر! و ماشي غير هادشي زيدك هادي السيد ولا كيتنبأ بالطقس و الأرصاد الجوية، ايلا سولتيه من هنا ل 147 يوم شنو غادي كون؟ غايقوليك نهار الثلاثاء 21 في الشهر غادي يكون الجو مضبب و بارد و ما غاطيحش الشتاء! واش تخيلتي دبا مستوى العبقرية لي عند هاد السيد .
النوع التالت هو Asperger's Syndrome و هاد النوع مكانش عندو وجود حتى ل 1944 مني جا واحد العالم سميتو Hans Asperger و هو لي جاب لينا حالات جديدة سماها Asperger's syndrome . الناس لي عندها اصابة بمرض التوحد الذكي ولا Asperger's syndrome كتكون عندهم نفس القدرات العقلية الخارقة لي كاينة عند النوع اللول و التاني و لكن الاختلاف هنا كيكون في كيفاش يوصل للنيفُو ديالهم؟ و الاغلبية ديال هاد المصابين بالتوحد الذكي كتكون عندهم مشاكل صحية اخرى بحال العمى ولا اختلال فالتوازن العام ديال الجسم ... و من الامثلة على التوحد الذكي كاين واحد السيد سميتو Rex lewis clack و واحد آخر سميتو Danniel Tammet.
آجي مسولتيش راسك علاش المصابين ب Savant syndrome كلهم رجال و العيالات لا كيفاش زعما؟
الابحاث العلمية كتقول ان الاحتمال باش يتصاب الراجل بهاد المتلازمة كيكون من 4 تال 6 دالمرات من الاحتمال ديال ان المرأة تصاب بيه، و فاش بحثوا العلماء على السبب ديال هاد الظاهرة لقاو ان الجنين مني كيكون في الرحم كيكتامل النصف الأيسر من المخ او ما يسمى ب Left hemisphere قبل من النصف الأيمن، و كاين احتمال باش يتصاب هاد الجزء من المخ بالتلف و يقدر يوقع ليه تحفيز بسبب تواجد Testosterone ولا هرمون الذكورة و في هاد اللحظة ايلا تزادت Testosterone لواحد مستوى معين قبل ميتزاد الجنين كيوقع تلف كبير في الجزء الأيسر من المخ و هادا هو السبب لي خلا الرجال كيتصابو ب متلازمة العبقري كتر من العيالات.
تعليقات
إرسال تعليق