في السينين الأخيرة بانت فمواقع التواصل الاجتماعي ظاهرة المؤثرين influencers وكل واحد كيحاول يبان على أساس أنه إنسان مؤثر لدرجة البعض اعتبرها مهنة كيترزق منها، بحث بسيط على الصفات اللي خاص تكون عند هاد الأشخاص خلاني نوقف عند صفة مهمة اللي هي الكاريزما ( CHARISMA )، أشنو هي الكاريزما و أشنو خاصني باش نكون إنسان مؤثر؟
الكاريزما كلمة مشتقة من الكلمة اليونانية "Charizestai" بمعنى نعمة، وهي هبة إلهية كتخلي الشخص مفضل عند الناس، وكيما عرفها frédéric Bon على أنها قوة الاغراء و السلطة بمختلف صورها اللي كيمارسها فرد على جماعة معينة، و أول مرة تستعملات كلمة كاريزما في الجانب العلمي كانت من طرف عالم الاجتماع الألماني Max weber و عطى ليها صبغة سياسية و اللي فسرها بأنها قدرة كيتمتع بها شخص معين للتأثير في الآخرين لدرجة أنه كيكون مركز قوة بالنسبة ليهم وبكثرة التأثير كيعطيوه حقوق تسلطية عليهم كنتيجة للقدرة التأثيرية.
الكاتب kurt w mortensen في الكتاب ديالو THE LAWS OF CHARISMA هضر على قوانين الكاريزما و لخصها على أنها كتكون من تلاتة ديال الحوايج:
الحضور الكامل : حضورك باختصار هي الطاقة اللي كيحسو بيها الناس فالبلاصة اللي أنت فيها ، وباش يكون حضورك كامل و قوي أول حاجة ديرها هي "متقطعش الكلام" ... مثال: "جالس مع صاحبك كيعاود ليك شي حاجة وقعات ليه وأنت كتشوف فيه وكتحرك راسك بحال ايلا متبع معاه والحقيقة أنت كتوجد قصتك اللي قريبة من داكشي اللي وقع ليه ومكتخليهش يكمل وكتقطعو باش تعاود أنت قصتك" ... هادشي سميتو "سرقة المحادثات" Conversations stealing وهي غلطة كتوقع فيها و كتخلي حضورك ضعيف، ايلا كنتي كديرها حاول تحكم فراسك وخلي التركيز ديالك كولو على الشخص ماشي على راسك وايلا كيعاود ليك شي حد شي حاجة خاصك تفاعل معاه وتتعاطف معاه وايلا بغيتي تحيد هاذ المشكل من الجذور ديالو خاصك تعرف علاش فالأصل كدير هكا ، أنت كتسرق المحادثات حيت مركز على راسك و بغيتي تخلي البصمة ديالك ،واخا ،أجي نشوفو الانطباع اللي خليتي؟ ضروري غادي تكون اتصلتي بشي حد من قبل ومعطاكش انتباه ديالو، باش حسيتي؟ كعيتي؟ بقا فيك الحال؟ تخيل بلي هذاك هو إحساس هذاك لقدامك، داكشي علاش خاص ضروري تبين للطرف التاني بأنك كتسمع ليه ومنتابه لداكشي اللي كيعاود ... كيفاش؟ خاص تبقى متواصل معاه بعينيك "تواصل بصري" تتجاوب معاه بتعليقات على كلامو و تحاول تسولو أسئلة فداكشي اللي كيعاود ليك غادي تبين ليه بأنك منتبه و مهتم بداكشي اللي كيعاود. حاجة اخرى هي مهارات التواصل والإلقاء مهمة للحضور بشكل قوي وكامل ، الناس اللي كيكتمتعو بكاريزما عندهم القدرة على الحفاظ على انتباه الناس، وباش تحافظ على انتباه الناس خاصك تحاول تجنب بعض أخطاء التواصل الشائعة اللي ممكن تكون كطيح فيها مثال، كتكلم بزاف، مكاينش تواصل بصري، كتهضر بلغة ممفهوماش، كتهضر بالزربة ولا العكس كتهضر تقيييل، ولا كتحاول تعطي بزاف ديال المعلومات فوقت قصير ولا كتبين العصبية والخوف فكلامك... كولشي هادشي كيخلي آثار سلبي عند الناس خاص ترد البال منها.
ندوزو للمكون التاني من مكونات الكاريزما اللي هو:
إظهار النفوذ و القوة: ايلا كنتي مستمع جيد ومكتركزش على راسك غادي تكون شخص مقبول و محبوب واخا متكونش عندك كاريزما وباش تمتلك هاذ الصفة خاصك تبين القوة ديالك ... كيفاش؟ معنى القوة هنا هو الثقة بالنفس، حيت ايلا حسيتي بلي تايق فراسك، الناس اللي دايرين بيك و بشكل تلقائي غادي يحسو بيك قوي، الثقة عكس الخوف ، الثقة هي القدرة على التعامل مع مشاعر الخوف بشكل سليم و تحاول تسيطر عليها، ملحوظة مهمة ماشي معنى انك تايق فراسك هي تبان حاس براسك و مغرور ، أش خاص دير؟ خاص تحافظ على الخط الفاصل بين التواضع و الغرور مثلا تخيل درتي شي إنجاز و الناس كتهنيك عليه ايلا كنتي متواضع بزايد غادي تستعمل عبارات تقلل فيها من قيمتك وقيمة الإنجاز اللي درتي و غادي تخلي إنطباع للناس بلي مدرتي والو نيت، وايلا كنتي مغرور واستعملي عبارات التعالي بحال انا خدمت بزاف و ضربت عليه تمارة و صعيب على شي حد يدير داكشي اللي درت ...غادي تبان مغرور وغادي تطيح من قيمتك وقيمة داكشي اللي درتي، خاصك تكون معتدل فكلامك بين البينين، مترفضش الثناء و التشجيع ديال الناس وفنفس الوقت حاول تشكر الناس اللي تعاونوا معاك ولا دعموك ولو معنويا ، هكا غادي تكون شديتي العصا من النص. المكون الثالت :
التعاطف، الناس كيعجبهم يحسو بلي مفهومين و معترف بيهم ، وايلا قدرتي تحسسهم بلي انت قريب ليهم وكتفهمهم غادي يحسو بلي مرتاحين يكونو معاك ، وهادشي يمكن يدخلو فيه تقنيات الذكاء العاطفي (نقدرو نهضرو عليه فموضوع بوحدو) ، فاش كتحط الناس فحالة سعادة كتخليهم يفكرو فيك بشكل إيجابي ويتقبلو افكارك ووجودك ... كيفاش؟ تحاول تشوف اشنو لمخبيين لداخل ديالهم، تحاول تسمع ليهم بوذنيك وعقلك وقلبك، حاول تقرا لغة جسدهم وتعرف المشاعر والعواطف ديالهم و تحسها معاهم، ايلا قدرتي غادي يحسو بالتعاطف ديالك و يتأثرو بيك وحاول تكون لطيف و مرحب ديما باي واحد بدون مقابل.اخر حاجة هي التقدير ، باش تقدر تعطي لشي واحد قيمتو خاص تكون قادر تفهم الأنا ديالوا ، الناس كولهم كيبغيو يحسو بالقبول و التقدير، انت الدور ديالك تدعم التقدير الذاتي ديال الناس ... بحالاش؟ بالشكر الصادق (لا يشكر الله من لا يشكر الناس) تحاول تقدر الحاجة اللي دارو على قبلك، الشكر ماكيكلف والو العكس كيحل ليك الابواب، وفاش تبغي تشكر خلي الشكر ديالك مرتبط بموضوع أو مواقف معينة باش متبانش متملق.
الكاريزما شخصية قوية، ظاهريا كتعطي فيها كثر ما كتاخد و باطنيا كتكون ملكتي شخصية قوية محبوبة و حكيمة.
السؤال هنا واش كاع هاذ الناس دابا الاي فمواقع التواصل الاجتماعي عندهم الكاريزما؟
تعليقات
إرسال تعليق