مثلث برمودا أو (مثلث الشيطان)
مثلث برمودا أو (مثلث الشيطان) هو منطقة فالجزء الغربي ديال المحيط الأطلسي كاتختفي فيها الطائرات و السفن و هاد المثلث محصور فثلاثة ديال النقط و هي : جزيرة برمودا و بورتوريكو و فلوريدا، و المساحة ديال هاد المثلث هي : مليون كيلومتر مربع .
أول واحد غايجبد الصداع على مثلث برمودا هو واحد الصحفي أمريكي سميتو فينسينت جاديس (Vincent Gaddis) و من بعد من هاد السيد بان واحد آخر سميتو Charles Berlitz هو اللي عطا شهرة كبيرة لهاد المثلث، حيث أنه قال بلي المثلث جا فوق من جزيرة أطلنتس الأسطورية و جمع هادشي كامل فكتاب سميتو The Bermuda Triangle خرج عام 1974 دار BOOM فالعالم الكامل فهاديك الفترة، و من هاداك الوقت و المواقع و القنوات و البرامج كيهضرو على المثلث و الألغاز و الشياطين و الفضائيين و أي حاجة ممكن تفسر الغموض ديال الاختفاءات اللي كاتوقع فهاداك المثلث.
ندوزو دابا للمهم، و نشوفو الفرضيات اللي تقدر تفسر لينا الغموض، كاين جوج أنواع ديال الفرضيات :
◾الفرضيات الخيالية :
كاينين بعض الكتاب و المؤلفين اللي قراو بزاف ديال الروايات و الكتب الخيالية ديال الإغريقيين و تاقو أنه كاين واحد الجزيرة سميتها أطلانتيس اللي كانت فيها بزاف ديال التكنولوجيات اللي الانسان مازال ماكتاشفهاش لحد الآن، و السبب ديال اختفاء الطائرات و السفن هي طاقة مجهولة كايولدوها أهرام كريسطالية فقاع المحيط، بينما آخرين كايقولو أنه كاين بوابات زمنية فقاع المحيط فمنطقة برمودا بسبب فتحة فالنسيج ديال الزمان و المكان، و كاتختفي الطائرات و السفن لأنها كاتنتقل لزمان و مكان آخر ...
◾الفرضيات العلمية :
التخمينات العلمية اللي كاتحاول تفسر هاد اللغز كاترجع فرضية اختفاء الطائرات و السفن لاحتراقها بسبب غاز الميثان المنبعث نحو سطح المحيط، بحيث أنه يمكن للبرق أو أي شرارة نارية أو كهربائية تشعل العافية فشي فقاعة ديال الميثان و بالتالي احتراق الطائرة أو السفينة اللي دايزة من تما بلا مايبقى ليها ولا أثر! و لكن هاد الفرضية فيها بزاف ديال المشاكل، الميثان كاين فجميع المحيطات ديال العالم، إذن ايلا كان هو المسؤول على هاد الظاهرة فا كنا غانشوفو حوادث الاختفاء فجميع البحار و المحيطات و بالتالي الفرضية خاطئة. كاين وحدين آخرين كايقولو أن السبب هو شذوذات فالمجال المغناطيسي الأرضي فمنطقة مثلث برمودا، الشيء اللي كايخصر أجهزة الملاحة و التعقب بحال GPS (نظام تحديد المواقع العالمي) و البوصلة الشيء اللي كايخلي الطائرة تمشي نحو المجهول و تطيح فالبحر، و لكن ؟؟ ايلا كان شي طيار كايقرا هاد المقال غايقوليا راك كتخربق، و فعلا، الطيارين مدربين باش يسوقو الطيارة منين تمشي ليهم الملاحة الالكترونية + هاد النظرية غير صحيحة ايلا طبقناها على السفن!
دابا سالينا من سرد الفرضيات المتعلقة بتفسير هاد اللغز، إيوا دابا شنو بان ليكم ؟ شنو اللي منطقي كتر ؟ إينا وحدة من هاد الفرضيات اللي نتيقوها ؟ الباحث الجيد و اللي عندو منهج علمي فالتفكير غادي يطرح هاد السؤال :
واش كاين شي لغز أصلا ؟ واش كاين شي ظاهرة غريبة خاصني نفسرها ؟
أول واحد طرح هاد التساؤل هو الصحفي "لاري كوش" و كانت النتائج اللي جمعها فالأبحاث ديالو رائعة ! بحيث أنه الأبحاث ديالو بينت أنه ماكاينش حتى لغز ديال مثلث برمودا متعلق باختفاء الأشياء و الأشخاص و الطائرات ...
هاد الصحفي تجاهل جميع المقالات و الابحاث القديمة على مثلث برمودا و خدم بوحدو باش يجمع قدر كافي من المعلومات، بعدما درس الظاهرة و الاختافاءات اللي وقعات و التواريخ و الأشخاص المعنيين بالأمر تبين ليه أنه ماكاين حتى لغز أصلا ! و كاع هاد الخزعبلات مبنية على الكذوب و المغالطات بهدف ترويج الألغاز و الغموض و الأخطاء لدرجة أن بعض حالات الاختفاء غي ملبقينهم!
ذكر لاري كوش فالتحقيق ديالو أن جميع الكتّاب والمؤلفين اللي ربطو أطلنتيس بالمثلث أنه دارو عملية نسخوا أبحاث قديمة و بناو استنتاجات مغلوطة.
و بالتالي كايبان لينا أنه كذبة مثلث برمودا بدات بالتخربيق ديال الكاتب تشارلز بيرلتز و عطاوها الناس قيمة كبيرة فالعقول ديالهم و روجوا عليها بزاف ديال التفاصيل الوهمية حتى كبر الموضوع و ولّا مصطلح مثلث برمودا مرتبط بخرافات قديمة.
و من جهة أخرى، بزاف ديال الطائرات و السفن اللي غرقو، ربطو الحادث ديالهم بمثلث برمودا، رغم أنهم طاحو فأماكن بعيدة على منطقة برمودا فالمحيط الاطلسي، بالاضافة لكون هاد المثلث كايشهد حركية كثيفة ديال الملاحة الجوية و البحرية فهاد السنوات بحكم أنه ميناء فلوريدا من أكبر الموانئ التجارية فأمريكا الشمالية + حركة الطيران فوق من المثلث كثيفة بزاف بسبب الرحلات الجوية بين أوربا و أمريكا أو إفريقيا و أمريكا و الخطوط السياحية العملاقة ... ، ايلا كان مثلث برمودا بصح ؟ علاش ماوقعت حتى حادثة اختفاء فهاد السنوات ؟ (من غير الطائرة الماليزية اللي اختفت فوق الصين) ...
هاد الحقيقة للاسف ماوصلتش لينا بكري، حيث لحد الآن الانسان مازال متيق أن مثلث برمودا فيه لغز بسبب الكتّاب اللي عزيز عليهم شويا ديال الأكشن. بينما العقل البشري هو اللي فيه ثقب أسود، حيث أننا كانبلعو الحقيقة و ماكانبغيوش نتيقوها خوفا من أنها تقضي على المعتقدات القديمة ديالنا.
تعليقات
إرسال تعليق