"اختلال الأنية" اولا Depersonalization
فعام 2007 غادي يخرج للقاعات السينمائية فيلم سميتو "Numb" البطل فيه كان كاتب مشهور ، واحد النهار كَلس مع صحابو و بقاو كيتعاطاو المخدرات ... فجأة السيد لقى راسو مابقاش كيحس بالأحداث اللي كتوقع فالمحيط اللي هو عايش فيه ومبقاتش عندو القدرة انه يتواصل مع الناس اللي متواجدين معاه فالمكان ، و فاش مشى عند أطباء نفسيين لقاو عندو حالة مرضية سميتها "اختلال الأنية" اولا Depersonalization اللي كتجعل اي واحد يحس بخلل ( Defect ) في ادراك المشاعر و الافكار و الذكريات ... و حتى الجسم ديالو ( واش هادي ايدي ؟! ، هذا انا نيت اولا شي واحد آخر ؟! ، هادشي اللي كندير فيه واش فعلا بصح ولا غير كيتخايل ليا ؟! ... ) ، هاد الحالة المرضية فيها جوج انواع ... اللول سميتو Depersonalization هو اللي كتحس فيه براسك منفاصل على الجسد ديالك ! و النوع التاني سميتو Derealization و هذا كيعطيك انطباع بانه مبقاش عندك اي اتصال بالواقع اولا المحيط اللي نتا عايش فيه ... و في كلتا الحالتين "اختلال الأنية" اولا Depersonalization كتخليك تعيش فعالم مليء بالاوهام بحال ايلا كتحلم !
الدراسات اكدت بلي كتر من 50% من سكان العالم حسو بهاد الاعراض على الاقل مرة وحدة فحياتهم و الاشخاص اللي تم الكشف عليهم كيشكلو 2% من اجمالي عدد المرضى المصابين ب Depersonalization .
اول مرة تكلمو على هاد المرض كانت هادي 200 عام... و في 1946 دارو بحث علمي على Depersonalization و هضرو عليه بشكل رسمي و لكن متعمقوش بزاف فهاد البحث بحيت كتبو عليه سطر واحد فقط ! و فسنة 1952 غادي تكون هي المرة اللولة اللي غيتكلمو فيها على هاد المرض فوسط علمي من بعد ما نزلت الطبعة اللولة ف DSM_1 او ما يسمى بالدليل التشخيصي و الاحصائي للاضطرابات النفسية ، او وصفوا "اختلال الانية" بانه تابع ل Dissociate disorders اولا الامراض الفصامية و الانشقاقية ... حتى نزلات الطبعة الخامسة DSM_5 و جمعت بين "اختلال الانية" و تبدد الواقع ( Dpersonalization derealization disorder ) و هو اللي معروف اليوم ب "DDD" .
دبا اي واحد شاف هاد الاعراض غادي قول على راسو "انا مريض" ! مع العلم ان هاد الاعراض ممكن توقع لأي واحد عادي بلا ميكون عندو هاد المرض . و اغلبية الاطباء النفسيين متأكدين بلي Depersonalization مرض نادر و كاين فالعالم بواحد النسبة كتمتل ف 2% .
اما بالنسبة للناس اللي تقدر تصاب بهاد المرض الدراسات اكدات انه مكينش فرق ببن الدراري و البنات و احتمالية الاصابة ب Depersonalization كتبقى متساوية بيناتهم وهاد المرض كيصيب الناس ابتداءا من عمر 16 سنة و 5% من المرضى كيتصابوا بعد سن 25 و هاد النسبة كتبقى تقل مع مرور السينين حتى كتوصل 40 سنة و هنا كتولي احتمالية الاصابة ب Depersonalization شبه منعدمة.
الاعراض ديال اختلال الانية كتشابه مع الامراض الدماغية و التشنجات و الامراض النفسية بحال سكيزوفرينيا ... ، ااه و لكن مقلتيش لينا اشنو هي هاد الاعراض ؟ ، من الاعراض اللي يقدر يتسبب ليك بها Depersonalizatio انك كتحس براسك بحال ايلا عايش فحلم معارفش كيفاش تفيق منو اولا عايش ف عالم افتراضي كلو اوهام ... الساعات الطويلة كيدوزو فثانية و الدقايق كيدوزو فأيام ! و هاد الاعراض تقدر تسبب ليك فالتوتر والاكتئاب ...
دبا شنو هي الاسباب اللي تقدر تخلينا نتصابو بهاد المرض المعقد ؟ ليومنا هذا الاسباب ديالو ممعروفاش لكن كاين عوامل بيولوجية وبيئية كتخلي بعض الناس اكثر عرضة انهم يتصابو بهاد المرض من ناس اخرين وكذلك تقدر تلقى اشخاص كتكون عندهم اضطرابات في الشخصية و اغلبية دالحالات اللي تم التشخيص ديالها كانوا كيعانيو لواحد الفترة طويلة من الصدمات بحال الموت ديال احد الاقارب اولا التعرض لتعذيب جسدي ...
كيفاش نعالجو هاد المرض ؟ اول حاجة نقولها لك غير تهنا حيت نتا مشي حمق اولا مسطي اولا بياس ديطاشي ! هادي صدمة تقدر توقع لأي واحد و الجسم ديالو فهاد الحالة كيحاول يكدبها ، تاني حاجة متفقدش الأمل ... بصح مكينش دوا كيعالج هاد المرض إلا انه كاين بزاف دالحالات قدرات تخلص منو بالعلاج النفسي ... كيفما هاد الناس قدرو يصحو حتا نتا قادر دير بحالهم لاشيء مستحيل. تالت حاجة الى كانت امرأة عندها هاد المرض و خايفة تحمل خوفا من انه ينتاقل لولدها نأكد هنا ب لي مكينش دليل علمي كيتبت ان هاد المرض وراثي اولا عندو علاقة بالجينات.
رابع حاجة العلاج السلوكي المعرفي ( cognitive behavioral therapy ) و هذا كيكون عند طبيب نفسي و كيتعتبر من افضل الطرق اللي يمكن تلجأ ليها للعلاج .
خامس حاجة Ground techniques هادي كنستخدمو فيها بعض الاساليب باش نتأكدو ب لي الحواس ديال المريض دايرة خدمتها بشكل طبيعي ... كيفاش ؟ بحال متلا الى شديتي الثلج و حطيتيه ليه ف ايديه، انطلاقا من ردة الفعل ديالو غادي تعرف واش فعلا هاد الشخص طبيعي اولا مريض ب Depersonalization .
سادس حاجة Moment to moment tracking الدور ديالو هو التسجيل المستمر للأعراض اللي كتوقع ليك باش تعرف بها الاحساسيس ديالك الى كانت حقيقية اولا مجرد وهم.
اما بالنسبة للأدوية حاليا مكينش دوا او علاج محدد يقدر يقضي على المرض بصفة نهائية و كيبقى افضل علاج هو المحيط اللي عايش فيه المريض خاصة العائلة ديالو اللي خاصها توقف معاه و تساعدو باش يسترجع الهوية ديالو الحقيقية و يحاولو ما امكن يستحملوه و ميفقدوش الأمل حيت الى جاب الله فقدو فيه الأمل غيبقى ديما كيعاني و عمرو مغادي صح.
تعليقات
إرسال تعليق