كفاش نولي واعر" Flow state"
اليوم غادي نهضرو على واحد اللعيبة واعرة سميتها التدفق الذهني او بما يعرف ب Flow state، و قبل ما نشرح ليكم اشناهو التدفق الذهني انفكركم فواحد البلان هاديك الوقيتة اللي كيكون كلشي فيها ميسر وكتكون فنهارك "بحال ملي كتكون مقصر شي ماتش كتحس راسك نتا هو 《ميسي !》 اللي جا قدامك كتقلبو، البيوتا كيوليو يتماركاو بسهولة ولا ملي كتكون كتخرج فشي تمرين وكيجيك كلشي ساهل المعادلات كتولي تخرج فيهم بحال "الضحك" وهادي هي مرحلة Flow state اللي فيها القدرات العقلية ديال الواحد كيتزادو وكنوصلو لواحد الحالة كنكونو في تركيز تام و كنكونو فاقصى درجات الوعي اللي نقدروا فهاديك اللحظة نبدعوا فيها ونديرو اللي بغينا والوقت مكنبقاوش نحسو بيه مكنبقاوش حاسين بريوسنا.
و دابا البلان هو كيفاش نوصلو لهاد Flow state ؟ واخا اسيدي انا غنقوليكم كيفاش، جاو واحد جوج دالناس اللول فيهم انشأ Concept ديال Flow state اللي اسميتو Mihaly Csikszentmihaly و التاني سميتو Steven Kotler ودواو على Flow state فجوج كتوبا واحد سميتو Flow: The Psychology of Optimal Experience والتاني سميتو The Rise of Superman وقالك كاينين جوج ديال الطرق باش نوصلو Flow state، ندويو على الطريقة اللولة اللي هي Internal Triggers او المحفزات الداخلية اللي هي خصك تاخد واحد Challenge اللي قد مستوى المهارة اللي عندك ولا فايتها بربعة فالمية عرفتي بحالاش، بحال ايلا بغيتي تقصر شي ماتش مع شي خمسة مزيانين وخصك تلعب ضد فرقة عندها نفس النيفو ديالكم ولا واعرة عليكم بربعة فالمية المهم خونا قاليكم باش توصلو Flow state خصكم ديما تحداو ريوسكم وخص التحدي ديما يكون كبر من مستوى المهارة ديالكم بربعة فالمية.
الطريقة التانية اللي هي External Triggers او المؤثرات الخارجية اللي حتى هي فيها جوج ديال الحالات الحالة، اللولة اللي هي Novelty and unpredictability بمعنى تعيشو تجارب جديدة ولا ديرو شي حاجة غير متوقعة عرفتي بحالاش، بحال مثلا ملي كتمشي للغابة ولا البحر ولا ملي كتسافر لشي بلاصة جديدة كتحس بواحد الشعور فشكل "واعر" اللي كتكون ناسي فيه كلشي وكتبغي تكتاشف حوايج جداد ... والحالة التانية Deep embodiment واللي هي فاش كتبغي تعلم شي حاجة للمرة الاولى واللي كتطلب تركيز ديال بصح، مثلا كنتي كتريني ولا باغي تعلم الغِيتار ولا باغي تفهم شي درس لاول مرة وكتبقى تعطي لدماغك Les informations حتى كيوصل لواحد النقطة كيبغي يتفركَع.
نزيدو نبسطو كتر قالك اسيدي Flow باش توصل ليه خاصك دوز من اربعة مراحل لي هوما :
The struggle (المعاناة)✅
The relaxation (الاسترخاء)✅
The flow (التدفق)✅
The consolidation (التماسك)✅
وا آجي دابا نشرحوهم وحدة بوحدة وخا Flow كيكون شعور زوين ولكن كيبدا بمرحلة قاصحة اللي هي #المعاناة او The struggle وهي المرحلة اللي كتعاني فيها فاش كتكون يلاه باغي تعلم شي حاجة لاول مرة سواء كانت قرايا ولا Sport ولا اي مهارة جديدة باغي تعلمها، متلا ايلا بغيتي تعلم ضرب الغِيتار فالاول كيجيك الملل وكيجيك دكشي صعيب راسك كيبغي يتفركَع ويديك كيضروك فهديك اللحظة كيتفرزو هرمونات اللي مسؤولين على Stress بحال Cortisol و Adrenaline وهنا يا تصبر من بعد تولي تقصر الغِيتار مزيان يا غاتحبس وكتقول وا مالي على هاد الصداع الراس ولكن را ما غادي نتعلم تا وزا.
المرحلة الثانية ديال #الاسترخاء او The relaxation اللي هي فاش كتقول باركة انحبس نستارح واحد الشوية كتحط هاداك الغِيتار للأرض وكتمشي تقصر شي ماتش ولا Play ولا كتصنت الموسيقى ولا كتفرج في الأنمي بحال ناروتو ون بيس.... وهنا كيتفرزو هرمونات بحال Dopamine و Endorphine اللي مسؤولين على السعادة و كيعجبك الحال ملي كترتاح فهاد اللحظة شنو كيوقع ؟ الوعي ديالك كيخلي اللاواعي هو اللي دير les traitements ديال هادوك les informations الجداد اللي عطيتي للدماغ و كينضمهم مزيان.
موراها كتجي مرحلة #التدفق او The flow اللي prefrontal cortex او "القشرة الجبهية" ديال دماغنا كاديزاكتيفَا فيها و هنا شنو كيوقع؟ كتولي فنهارك وكيوليو يطيحو عليك افكار جداد فيهم حس الابداع مكيجيكش الملل وكيولي عاجبك الحال و كاتوصل big performance ديالك وكتكون بالعربية فنهارك. المرحلة اللخرة اللي هي #التماسك او The consolidation و هي الحالة اللي الذاكرة والتعلم ديالك كيتزادو وكتولي احتمالات جداد ودماغك كيبقى عاقل على كاع داكشي اللي طرا ليك ملي كنتي فمرحلة Flow state، نفكركم ايلا كان التحدي كبر من المهارة بزاف غادي تحسو بالطاقة وايلا كانت المهارة كبر من التحدي غادي تحسو بالملل دكشي علاش ديما خاص التحدي يكون اكبر من المهارة اللي عندك بربعة فالمية دابا المشكل هاد Flow شعور كيكون مؤقت داكشي علاش ايلا بغينا نبقاو نحسو بيه خصنا ديما نبقاو نقلبو على تحديات جداد ونعيشو تجارب جديدة والواعرة انهم قامو بالعديد من الابحاث لقاو ان الناس فاش كيكونو فحالة التدفق الذهني الانتاجية ديالهم كتزاد على كتر مني كيكونو فالحالة العادية ها نتوما فهمتو دابا Flow state شنو كيعني نقوليكم واحد البلان اول محفز باش توصلو Flow بعدو على التخربيق والخوى الخاوي بحال التلفزة و الفضائح دكشي را مامنوش وركزوا على اللي غادي يخليكم تفكرو والتحديات اللي غادي زيدو بكم القدام ...
تعليقات
إرسال تعليق