التحفيز
باغي تشوف التغيير فحياتك و باقي محافظ على نفس التفكير و نفس العقلية لي ربما وصلتك للفشل و باقي عايش بنفس العادات السلبية ... بغيتي تشوف التغيير دوز للفعل ماتسناش التغيير يجي راسو را مستحيل بقيتي تسنا تما ... بغيتي مستواك فالدراسة يتطور قرا راجع و خدم و غاتشوف التغيير بغيتي خدمة خرج قلب عليها الى مالقيتيش زيد قلب ماعندكش شي خيار اخر عمرها غاتجي دق عليك الى ماقلبتيش عليها ... صحتك ضعيفة دير الرياضة و تهلا فراسك بالماكلة ... كاتشوف بأن حالتك النفسية متدهورة قرا كتب ديال تطوير الذات و عرف المشكل لي كاتعاني منو و بحث ليه على الحل ... أي حاجة بغيتيها دير علاش باش تحصل عليها و التغيير لي كاتحلم تشوفو فحياتك غايبدا من الداخل ديالك ماشي من بارا ﴿إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ﴾ صدق الله العظيم
و دير فبالك أن التغيير ممكن و حتى حاجة مامستحيلة بشرط تيق فراسك و تكون عندك رغبة كبيرة باش دير هاذ التغيير ... كيفما بغات تكون الوضعية ديالك دابا راه ممكن تغير و تولي أحسن ما كاتوقع خصك غير تنوض و تنفض داك الغبار لي معشش فدماغك بأنك غاتبقا فاشل حياتك كاملة و بأنك ماعندك زهر و بأنك ضعيف الشخصية ... شوف تيق بيا كيفما بغات تكون شخصيتك ضعيفة حساسة عندك الوسواس ... هادشي كامل ممكن يتبدل و تولي حسن و تطور شخصيتك للأفضل، كيف كانقول خصك غير تاخد البادرة و تجرء تغير راسك و تغير حياتك.
ماتسناش شي حد يجي يغير حياتك فبلاصتك حياتك الى ماغيرتيهاش براسك تاواحد ماغايعقل عليك حيت كلشي مشغول بحياتو و ماتبقاش تعطي لراسك مخدر الاعذار باش تنعس و تسب كلشي فالامور الخارجية و تلعب دور الضحية بحال هاكا غاتزيد غير تكفس الامور و ماغاتستافد والو و راك كاتكذب غي على راسك تحرك نت مامحتاج لتاواحد محتاج لراسك لا غير محتاج ضرب تمارة الى بغيتي تعيش ديك الحياة لي كاتحلم بيها ... محتاج تيق فراسك و تخشي راسك فينما كان و تقاتل حتى توصل لداك نيفو لكبير لي كاتحلم بيه حايد الكسل و التماطل الى فعلا كنتي باغي تغير حياتك و توصل لأهدافك.
تعليقات
إرسال تعليق