كيفاش نستعد L'ENTRETIEN ؟ الجزء الثاني
من بعد ما وجدت CV و LM و استعديت نفسيا و دخلت لمكتب ل entretien و جلست و تمكنت من نفسي مزيان ... شنو مطلوب مني !
نبداو دابا فالصحيح...
قبل أي حاجة خاصك تعرف بلي كولشي على الإعداد لي خاص دير قبل و توجد الحجج ديالك. يعني قد لسانك قد دراعك ...
أجي معايا باش تفهم مزيان :
أول حاجة خاصك T présenter راسك مزيان كل حرف فبلاصتو لسانك مطلوق وصوتك ف مستوى عادي ما مرتفع ما منخفض دوي على راسك مزيان، آش عندك.هنا غا يهجم عليك بالأسئلة ... خصوصا هنا خليك ساكت حتى يكمل سؤال ديالو هو عاد جاوب حيث لا شافك خايف ولا داير فيها واعر فأي سؤال يقدر يوجهو ليك عمدا و يصيدك و يقولك قول لي من بعدك يدخل و أخيب مرحلة هي هادي و تبع معايا آآاا حنيني ...
قريتي CV و Lettre_de_Motivation ديالك مزيان يآآاك .... وجدتي حجج لي دوينا عليهم !الحجج ديالاش ؟ آرا ليا ما عندك دبا ... 
الحجج ديال الشادة و الفاذة ف CV ديالك .. بالنسبة لبوعو أي كلمة مكتوبة ف CV راها موضوع يهضر معاك عليه. إذن أي حاجة تما خاصك تكون قاد تهضر عليها بسلاسة و تبين القيمة ديالها، يعني علاش حطيتيها تما باش يشوفها !
(بين قوسين جبدت CV جبدتو، هاديك l partie د Loisirs و Divers ولا Centre d’intérêts لي كاتزيدوها ف CV راه بالنسبة للأغلبية ديال بوعويات غير زايدة تما، مالقيتي باش تعمر CV درتيلو راه عزيز عليا السفر و القراية، و من بعد ؟ فاش غادي ينفعني هادشي ؟ آلوغ من الأحسن بلاش، المهم حتى يلا درتيها حاول تكون ذكي و تربطها بال Besoin ديال بوعو لي قبالتك، دابا ندير مثال بلاتي شوية)
حتى ل هنا مزيان، من بعد و بالنسبة ليا هادي نقطة مهمة بزاف؛ فالمقابلة ديالك حاول تستعمل Vocabulaire الخاص بالشركة لي راك ماشي ليها، بمعنى قبل ما تمشي غادي تقلب علا الديطاي ديال الديطاي ديال هاديك الشركة و ترجعو هو البايبل ديالك. هنا كايعرفك بوعو Motivé و ما تحتاجش تقولو راني متحمس للخدمة معاكم كيما قالوها هادوك ال200 واحد لي صيفط قبل منك 
ندوزو دابا ل فوسط المقابلة، آش خاصك دير؟
أول حاجة هي خاصك تعلم تجر الإهتمام ديال بوعو لعندك،
لأنك فأخذ و رد ما خاصكش تجاوب على السؤال كيما عطاه ليك مباشرة وتسكت... غادي دخلو فواحد الرتابة و الملل و يبقى يقول آممم هاد سيد كاين و مركز لي چالس معاه دابا 
هنا نقتارح عليك واحد الطريقة عزيزة على بوعويات سميتها STAR نطبقوها نيشان فمثال :بوعو : هضر ليا علا التجربة ديالك فالشركة X
نتا :
أ. S = Situation / contexte : خدمت من 2014 تال 2016 فالشركة الفلانية لي كادير كدا (ماتعطيش لي ديطاي عليها)
ب. T = Travail / fonction : بديت معاهوم ك assistant و من بعد زدت تطورت فالشركة و شديت البوسط د Chef de Projet
ج. A = Actions / missions : خدمتي كانت أساسا سي كدا و كدا و كنت مكلف بكدا (المهم خود راحتك هنا)
ت. R = Résultat : بفضل هاد البوسط قديت نطور المهارات دياولي فكدا... تعلمت نتحكم فكدا... عتارفو بيا فكدا ... جاوني بزاف ديال التهاني من المدير ... (هضر و ودخل داكشي لي بغيتي تبين comme compétences)
ثاني حاجة، خاص تعرف علاش كايقلب بوعو، يعني خاصك تكون متمكن من آش درتي قبل، و تكون عارف علاش راك نتا چالس قبالتو ديك الساعة و ماشي واحد آخور، و تكون عارف البوسط لي راك دافع ليه مزيان.تا هادي عندها واحد l Méthode عزيزة عليهوم سميتها PPF، نطبقوها تا هي :
بوعو : علاش دفعتي لينا ؟ ولا علاش جيتي لهنا ؟
نتا : (وايآآآآآآآاك ثم واياك تقولو حيت شفت l'annonce و عجبني الصالير ههههه، ..) 
المهم،
أ. P = passé : بديت لا كاريير ديالي فكدا لمدة X عام، و خدمت على كدا، الحاجة لي تمكنت بفضلها من تطوير القدرات ديالي ف كدا، و خلاتني نتعلم كدا إلخ إلخ ...
ب. P = présent : و من بعد هاد المدة عرفت بلي يمكن ليا نوظف القدرات ديالي فالحاجة الفلانية، و تلاقيت ببزاف د les cadres لي أكدو ليا بلي نقدر نعطي فيها كثر.
ج. F = futur : هادشي علاش أنا قدامك دابا باش نقنعك بآش عندي ما ندير و نبين بلي راني قاد نوظف هاد المخزون المعرفي ديالي فالشركة ديالكم، خصوصا ملي شفت بلي كاتقلبو على شي حد يكون تايدير كدا و كدا و كدا، و هادشي تماما آش كانتقن، هادشي علاش شفت بلي نقدر نرافقكم ف ال Projet الفلاني.
يعني باختصار السؤال فاش كايتوجه ليك، راه المهم ماشي هو تجاوب عليه و فقط، و إنما تلقالو صلة ب poste لي راك دافع ليه و تبروتيجي راسك فيه.
ندوزو دابا ل Les Liens
، يعني نقط الإتصال لي غادي دير بين كاع داكشي لي كتبتي ف CV ديالك، و هذا عامل خطيييير إلا عرفتي توظفو، هنا بوعو كايولي يشوف فيك واحد Le charme professionnel لا يقاوم ...إذن المرة الجاية (مثلا) إلا سولك بوعو شنو هوما Les qualités ديالك، غادي تكون أكبر مكلخ إلا قلتيلو "أنا منتظم و غيچوغو و بوليڤالون و زوين و مثقف"...
بالعكس خاصك دير Les qualités ديالك فواحد السياق و تشرحهم و تجبدلي الصلة ديالهم معا البوسط لي باغي.
نعطيك مثال،
درتي ف Loisirs السباحة (واخا غا زايدة هاد Loisirs)... دابا آشنو علاقة السباحة بالخدمة ؟ آجي تشوف :
خدم لي هنا ل PPF :
أ. Passé : بديت نمارس هاد الرياضة لمدة X عام (ما طولش بزاف).
ب. Présent : عرفت تما بزاف دالناس و أكثرية الأستاذ ديالي لي كان تايعيط ليا نوقف معاه فحصص التدريب، علاش؟ حيت شاف فيا واحد القدرة على تحفيز الناس (Motivation زعما) و دفعهم لتحدي راسهم و يكسرو القيود لي شادا القدرات ديالهم.
ج. Futur : أنا على علم تام بلي باش نكون Chef de projet مزيان فالشركة ديالكم خاصني نكون قادر باش ن Gérer L'équipe ديالي و نچيديها مزيان، و بحكم أني قادر نأثر فالناس بسهولة يمكن ليا نخدم معاهم بكل سلاسة ونخدمهم معا بعضهم. و هادي من بين الأسباب علاش دفعت ليكم لأن هاد لبوسط غادي يتيح ليا الفرصة نوظف آش كانعرف ...
خلاصة القول :
* خدم لا ميطود STAR باش تشرح شي حاجة سولك عليها بوعو و باش ما تلفش فالهضرة أو إلا حسيتي براسك ستريسي شوية.
* خدم لا ميطود PPF باش تخلق واحد الخط زمني متكامل ديال شي إكسبيريونص وT Projeter راسك مع بوعو.
* اعتمد فأي حاجة علا الروابط و الصلات معا البوسط لي راك دافع ليه باش داك السبع يحس بتناسق و لوجيك فهضرتك.
مانساوش بطبيعة الحال اللباس و الحالة و الچلسة المقادة و الثقة فالنفس.نتلاقاو فالجزء الثالث بالنسبة لي ما عندوش تجربة أو خبرة عمل إن شاء الله.
و ماتنساونيش إلى ستافدتو و شارك معا الحباب و الصحاب و كاع العائلة و طاكيهوم .
تعليقات
إرسال تعليق