الفرق بين الطب الحديث والطب البديل
اجيو نتناقشو شوية؟؟
لمهم غانقولك رأيي فواحد المسألة و تحليلي فيها و عطيوني تحليلاتكم و نتناقشو ؟؟
علاش خاصني ماشي ديما نمشي للطبيب و علاش خاصني نتوجه احيانا للطب البديل...
كيفما كنعرفو كلنا ان الطب البديل هو اب الطب الحالي... اه داك الطب ديال التدواي بالاعشاب و الوخز بالابر و الحجامة و حتا الكي و التداوي بالعسل... كلهم هو اساس الطب الحالي... و هاد الطب لي سماوه الطب البديل فالحقيقة هو الطب الرئيسي حيت تشخيصاتو كيكونو اكثر دقة احيانا من الاجهزة، غاتقولي ربطها غانقولك سول ناس لي مجربين طب البديل... بكل بساطة حيت داك الرجل ولا داك الطبيب لي كداوي بالطب البديل كيكون جد متمرس او واخد الحرفة عمليا يعني من صغرو كان كيشوف ربما جدو ولا باه "غالبا الطب البديل كيمشي بالوراثة"
من صغرو كيشوف باه ولا جدو كيفاش كيشخص الامراض و ملي كيبدا يوعى كيدخلو يعلمو داكشي باليد و العين المجردة ... كيفاش يقطع بومزوي كيفاش يكوي على بوزلوم ولا بوصفير ولا كيفاش يشرط و كيوريه مواضع الدقيقة لي خاص يشرط ولا يكوي فيهم... و كيوريه الاعشاب لي صالحة لأي مرض و كيفاش يستعملها... يعني كيعلمو الجزيئيات... خلاصة القول كيعلمو البراتيك ماشي كترة السميات لي كيدوخو بحال الطب الحالي... هادشي علاش كاتلقى ان العلاج بالطب البديل كيتم اسرع من الطب الحالي يعني كاتشافى دغيا كتر من الدوا ديال الصيدلية...
شوفو انا ماغنغيبش الطب الحالي غاا نهضر عليه غا كمل معايا تا لخر باش تفهم الفكرة ديالي ...
ذكرت فلول ان الطب الحالي هو الابن ديال الطب البديل... و ذكرت ان سرعة الشفاء فالطب البديل اكبر منه فالطب العادي و هادشي راجع ان الاعشاب طبيعية و مافيهاش حتا كيميائي زايد ... كلشي من الطبيعة اما الأدوية ديال الفارماسي راكم عارفين ان معضمها من البوكيماويات لي كيخرجو من النفط ولا كيتمو بتفاعلات اما لي كيجيو من اعشاب نيت فراه كاتلقاهم غاااليين و كمثال غير الماكياج ديال العيالات الحاجة لي طبيعية اغلى من الكيماوية... مفاهمين...
دبا ندوزو الطب ديال دبا لي ولا كيعتامد بزااف على الاجهزة فالفحوصات و التحليلات لي تقدر غير بفيروس بسيط فالمعالج ديال شي جهاز يتخربقو التحاليل... كاتلقى طبيب قليل فين يقيسك بيدو.. الاااا قاسك غايشوف لسانك ولا عينيك ولا حرارتك لا غير... هنا فين عواجت الفگوسة... و شحال من مرة كاتلقى اختلاف بين الاطباء فالتشخيص و كل واحد و شنو كيقول... ولكن هادو كاملين كيتافقو فحاجة وحدة هي يكنش و يعطيك تشري و هناااا فين خاصك تحل دماغك معايا ...
اي طبيب فاي تخصص الى مشيتي عندو ولو ماغيفحصكش و مايقلبكش غير من خلال هضرتك غايجبد الستيلو و يكتب لك شي دوا طبعا ماشي اي طبيب بالاحرى اغلبهم... كيشد و يقيد لك الله يجعلو يقيد لك غير دوليبران المهم ماتمشيس خاوي... علاش... هنا غاندخل فالتحليلات ديالي و ركز على ديالي يعني من مخي خااالص...
الطبيب كيقيد لك اي دوا حيت هو ضمن مجموعة من الميكانيزمات لي كاتحرك الاقتصاد فالجانب ديال الدواء... و كيف كنعرفو كلنا ان تجارة الادوية كتحتل المراكز المتقدمة و يمكن تكون اول تجارة مربحة... لمهم كتصنف هي و تجارة السلاح فالمقدمة... و هاد البيع و الشرا ديال الادوية المحرك الرئيسي فيه هو الطبيب هو لي غايعطيك اشمن دوا تشري... و كاين شي اطباء كيكونو متافقين مع شي فارماسي و كيعطيك تمشي عندو ديريكت و هادي شفتها بعيني كيقولك سير لفارماسي فلان فلاني هو لي غاتلقى عندو دوا... و ربما داير معاه شي بورسونطاج...
ماشي هذا المهم... المهم هو نتا شنو كيوقع لك... من غير انك كاتخسر فلوسك ربما فشي دوا ماعندو مايفيدك حيت نتا مستهلك و صافي... الاقبح من هذا هو ان داك الدوا لي كيقول الطبيب شربو راه كيولي يمشي لك مع الدم يعني كاتولي مبلي بيه و هنا كاتولي فينما يكمل لك تشريه و هادو غالبا فالامراض ديال الاعصاب ولا المعدة... و الاعصاب دواياتهم بزاف و غاليين ولا ديال المناعة ولا فقر الدم... كاتلقى راجل ولا مرا عايشة غا بدوايات ربما فلول راه ماكنش فيها تا مرض ولكن دمها ولف داك دوا و ملي كاتقطعو ولا كيقطعو كيتخربق لذلك كيظن ان ذاك دوا هو لي كيقاد ليه صحتو فحين هو لي خربقها ليه من لول... و هنا كاتولي نتا عند واحد فارماسي و عند الاجندات لكبار مستهلك وفي و كليان وفي...
هادشي من غير التحليلات لي كيكونو بثمن باهض احيانا و بلا ادوية ديال السويسيات و السبيطارات و بزاااف الحوايج... فهاد المجال لي هو ارفع المجالات انسانية كيرجع بعديمي الضمير مجزرة... و شحال من واحد باعو منو اعضاء وهو حي يرزق...
و طبعا راه الطب البديل و الطب الرئيسي متكاملين... ولكن كاتبقى النسبة الاكبر فين تمشي هو للطب الرئيسي حيت فيه ناس قاريين اما الطب البديل للاسف بداو كتلاحو ليه العربازا تحت مسمى انا شريف و معايا البركة و تقدر تلقى فيه من مظاهر الشرك ما يوجد في الاضرحة
لمهم هادشي كلو لي ذكرت و هاد التحليل كل غا من راسي تافقنا ولا ختالفنا الأمر لا يفسد للود قضية 
تعليقات
إرسال تعليق