“دخل مساري و خرج شاري”
“دخل مساري و خرج شاري” كإشهار بالنسبة لإنسان عادي أيقول راه غير قافية و صافي و لكن إلى كنتي قاري واحد الحاجة سميتها المارشوندايزين أتفهمها بشكل أخر وبعمق .
الناس اللي مكاتعرفهاش المارشوندايزين أولا هي ماشي علم هي واحد الحاجة طورها العقل البشري مع التطور ديال طرق البيع ومرتابطة أساسا بنقط البيع بحال مارجان أسواق السلام إلخ ... الهدف منها هو تزيد فالشيفر دافيير ديال شي منتوج أو عدة منتوجات ... وباش إتحقق هاد الإرتفاع فالشيفر دافير خاصك:
le bon produit : المنتوج الصحيح
au bon endroit : في المكان الصحيح
au bon moment : وفالوقت الصحيح
au bon prix : وبالثمن الصحيح
en bonne quantité : .والكمية الصحيحة
هادو كايتسماو بLes 5B de Kepnerهاد Les 5B تايقولو ليك راه ماشي أي برودوي غايتباع هكاك فينما حطيتيه وفوقتما حطيتيه خاص وا لابدا تدير كل حاجة و بالحساب وباش تولي مارشوندايزور أيخصك تكون:
براغماتي يعني أي حاجة كاتشوفها كاتعبرها حسب الفائدة ديالها.تكون على بال وتعرف أش كايدور فالسوق وشنو الجديد شنو اللي قدام المهم دبانة ماتزهق.تكون ضحوكي ماتكونش معبس حيت غاتحتاج ديك الضحكة فاش تكون كاتعامل مع بنادم وفاش تكون كادير الصونداج باش تعرف شنو باغي بنادم.الخيال والإبداع خاص إكون عندك وبجهد غاتحتاجو باش تبدع فالطرق ديال الإشهار وكيفاش توصل المنتوج لكلشي و تخلي المنتوج إبيع راصو براصو بلا ماتدخل انت وهدا هو الأساس ديال مارشوندايزين المنتوج إبيع راصو براصو
من بعد ماعرفتو المارشوندايزين شنو هي أرا نرجعو لديك لعيبة ديال الإشهار وعلاقتها بهادشي أسيدي مع التطور ديال المارشوندايزين الهدف مابقاش فزيادة دمنتوج واحد تطور باش إزيد فالشيفر دافيير ديال نقطة البيع كلها وهنا نافس البلان ديال منتوج واحد كاطبقو على المنتوجات كاملين الفكرة وهي تحط دوك الحوايج اللي كايتباعو بزاف فاللخر ديال مركز البيع داكشي علاش كاتلقى فمرجان ولا غيرهوم المنتوجات الغدائية فاللخر ديالو انت فاش كاتكون جاي تشري لحم كاتلقى راصك شاري شي لعيبات مامعولش تشريهوم وهاكدا انت دخلتي مساري وخرجتي شاري كتر من داكشي اللي بغيتي.
الناس ديال أكادير إيلا رديتو البال هادي 8 سنين تقريبا فمرجان ف 2012 كنتي تقدر دخل من أي بلاصة ماشي ضروري دوز على الإلكتروميناجي و انت باغي تشري غير لحم كاتدخل كاتمشي ديريكت لعند صحاب لحم وكاتخرج ولكن من بعد مارجان سد دوك المداخل وخلا دخلة وحدة من جهة الإلكتروميناجي دبا إلى باغي لحم خاصك وا لبدا دوز على التيليفونات الماطرييل دلاصال ماكلت الكلاب إلخ ... عاد توصل للحم.
من بين الطرق ديال تسويق كنوجدوا:
visuel
هاد النوع دالمغشوندايزين كايلعب فالأساس على التنظيم فمركز البيع خاص كلشي إكون منظم بلاصة الألعاب بوحدها بلاصة القس بوحدها بلاصت الحوايج بوحدها وهنا الأمر كايرجع المارشوندايزور (هكا كانسميو المسؤل ديال المارشوندايزين) باش إحدد كيفاش أيتقسمو الحوايج وكيفاش أيتحطو حسب مركز البيع.
Merchandising de promotion
هاد النوع كايتوجه بالتحديد لواحد العائلة ديال المنتوجات ولا لمنتوج واحد بحيث كادير شي تخفيض فواحد المنتوج عكس المنتوجات لوخرين باش تزيد فنسبة المبيعات ديالو إلى كانت ناقصة أو إلى كانت شي مناسبة هاد النوع مكايطولش بزاف يعني البرومو كاديرو لمدة سيمانة جوج شهر المهم حسب المنتوج ولا الوقت من السنة فاش درتيه.
Merchandising de gestion
هادي هو النوع اللي صعيب شوية حيت الهدف منو ماشي ترويج المنتوج حسب طلب هاد النوع الهدف منو ترتيب ديال البرودويات فلي رايون وخاص تدير ترتيب تربح فيه الإصباص بأكبر قدر ممكن ولازم عليك تعرف كيفاش ترتبهوم باش تحاول ما أمكن تربط بين الطلب ديال المستهلكين و تربح المساحة وسط مركز البيع وهنا فين كاينة الصعوبة ديالو.
Merchandising de séduction
نقدر نقول ليكوم بلي هادي هي الوحيدة اللي خاصها تسمى ترويج حيت كاتجمع بين الأنواع الثلاتة اللي دازو الفيزويل و البوموسيون و الجيستيون الهدف منها تخلي الكليان إلقى المنتوج اللي بغا بلا مايتلف بين المنتوجات كاملين هنا خاصك تلعب على الخيال اللي قلنا اللول لأنه مهم بالإضافة للإبداع خاص تكون عندك صورة كيفاش أتحط المنتوجات وكل منتوج إبان وإشوفو الكليان ومايتلفش بين العروض بإختصار كاع دوك الأنواع اللوالا تخدمهم خطرة وحدة.
Merchandising d’organisation
إوا من بعد مادير هادشي كامل غاتقدر تاخد صورة عامة على المستهليكين شنو كايشريو بزاف وشنو كايهمهم وشنو المنتوجات اللي مامحركينش فالمركز هكدا غاتعرف كيفاش تزرع المنتوجات فالبلايص ديالهم وتحيد اللي يتحيد وتزيد اللي تزيد.
من بين الطرق اللي كايتستعملو فالترويج للمنتوجات وسط المركز التجاري كاين الطريقة اللولا وهي مهمة جدا فالمركزالتجاري و اللي كاتسمى l’aménagement du point de vente بمعنى ترتيب أو تصميم مركز البيع باش كاع المنتوجات إبانو و إتباعو ما أمكن وهادي كاتمر ب 4 دالمراحل الأولى و هي Définir l’assortiment
غاتقولو شناهي الأسوغتيمون غانقول ليك هي مجموعة ديال المنتوجات المعروضة للبيع و اللي كاتكون بطبيعة الحال مدروسة قبل ماتحط باش تباع دبا ملي كاتكون عندنا هاد الأسوغتيمون غايخصنا نوزعهوم فلي غايون حسب العلو ديالها (بمعنى حسب تجانس المجموعة قلبا وقالبا اللي شكل مربع بوحدهم اللي مضورين بوحدهم) الوسع ديالها (بمعنى حسب المجموعات ديال المنتوجات المعروضة للبيع) أو العمق ديالها (بمعنى حسب الأصناف اللي كاينين فكل مجموعة متلا كوكا زيرو كوكا لايت كوكا نورمال) هادشي غير المرحلة الأولى المرحلة الثانية وهي Identifier la localisation des rayons فهاد المرحلة تايقوليك أودي خاص الكليان إدوز على أكبر عدد ممكن من الرفوف وبالتالي المنتوجات كما قلت فالأول خاص تعرف الحوايج اللي كايستهلكو الناس بزاف وتحطهوم فاللخر ديال المركز باش بنادم فاش تايدخل خاصو مايضور مزيان عاد إوصل لداكشي اللي بغا بهاد طريقة غايشري حوايج مكانش عوال إشريهم "دخل مساري وخرج شاري" .
المرحلة الثالثة Implanter les produits فهاد المرحلة كاتركز على المنتوج وكيفاش حطيتيه خاص تقدم كل منتوج بطريقة مناسبة وتحط المنتوجات اللي كاتنتامي لنفس العائلة بشكل عمودي وتقاد الواجهة ديالهوم المنتوجات اللي كاتباع تحطها فمستوى العين المنتوجات الموجهة لدراري صغار ولا مكاتبعاش بزاف فلتحت المنتوجات اللي فيها لبرومو تحطها بكثرة وتحطها فبلاصة باينة إلخ ... من لعيبات بحال هكا انت و الخيال ديالك 
أخر مرحلة فهاد لاميناجمون وهي
Mettre en place une procédure de contrôle هادي هي المرحلة فاش خاصك تحط المراقبين إراقبو المنتوجات شكون خاص شكون ماتباعش شنو طاح شنو اللي مامحطوش فبلاصتو المهم المراقبة . سالينا من هاد الأميناجمون مكانحملهاش حيت فيها كترت التفاصيل كلشي بالحساب أنمشي ونهضر على جوج طرق كايتخدمو واللي هوما بساط ومافيهومش بزاف دالفهامات الأولى كاتسمى
PLV (la publicité sur le lieu de vente)
وهي الإشهار داخل المركز التجاري كاتاخد برودوي وكادير ليه إشهار وديرليه شي أنيماسيون تهضر عليه فالميكرو دير ليه لافتة كبيرة مع الدخلة بين الرفوف واخا تبان ليك لا علاقة ولكن كترت ماكتشوفو وتسمعو كاتمشي تشريه ولا تشوفو لاش صالح. الطريقة التانية كاتسمىPAV (Prêt à vendre)
المثال اللي غانعطيكوم ساهل ماهل عرفتي فاش كاتمشي لاكيس تخلص كاتلقى تما المسكى الحلوى سنيكرز وبحال هاد اللعيبات صغار واجدين وموجودين باش تشريهم خاص غير إكون معاك شي برهوش إبرزطك بالمسكة ولا شي امرأة كاتوحم على سنيكرز ...
تعليقات
إرسال تعليق