قانون اغلاق الحساب البنكي رقم 503
✅ معلومة قانونية
فهاد الموضوع غادي نهضروا على قانون اغلاق الحساب البنكي رقم 503 من مدونة التجارة، الجريدة الرسمية رقم 6290 بتاريخ 11/09/2014.
كما كنعرفو كاينين جوج ديال الاطراف اللي هما Client و La banque او كاتجمعوهم واحد العلاقة تعاقدية و البنكة ما عندهاش الحق تعاقبك اولا تاخد ضدك اي اجراء قانوني حيت بكل بساطة البنكة مشي مؤسسة من مؤسسات الدولة و اي حاجة وقعت ما بين البنكة و الكليان كيرجع الحكم ديالها للمؤسسة القضائية سواء كنتي ظالم اولا مظلوم .
الحساب البنكي كيتسد فتلاتة ديال الحالات، عدم تفعيل الحساب اللي عندو شروط و الوفاة و انعدام الأهلية و قبل ما تسد ليك البنكة الحساب ديالك كتراسلك بواحد الرسالة الأجل ديالها ستين يوم و الا مستجبتيش راه خصو يتسد و العنصر اللول ( عدم تفعيل الحساب ) هو اللي عدنا بيه غرض هنا و حسب القانون 503 المؤسسة البنكية ملزومة بقوة القانون على اغلاق اي حساب بنكي داز عليه عام بلا ما يتفعل و مشي بالضرورة يكون الرصيد ديالوا قل من مية درهم ... و بطريقة اخرى ايلا كان عندك واحد الحساب و ما حركتيهش لمدة عام اوتوماتيكمون خص البنكة تسدوا ماشي تخليه مفتوح .
كاين اللي كيمشي عند البنكة كيقولوا ليه واخا ا سيدي حنا غنسدوه وكيسدوه في النظام الذاتي وما كيسدوهش في النظام المعلوماتي او العكس صحيح، الكليان ما كيكون عندو حتى شي دليل انه راه بلغهم باش يقفلوه او هذا كيتسمى التحايل ديال البنك على الزبون باش يسرقوه بالدارجة دونك ايلا الحساب ديالك مازال ما تسدش من بعد عام وكتحاول بنك انها تمتص منك الفلوس ديالك بطريقة غير شرعية يمكن ليك تكتب واحد الطلب ودير لو نسختين غاتقدم واحد لموظفة البنك او واحد قوليها تكاشيه ليك وتردوا، ايلا كاشاط ليك معندك حتى شي مشكل غتشد ديك الورقة كحجة انك بلغتي باش يسدو الكونط وتمشي فحالك .
مبغاتش تكاشي غتدي الطلب مباشرة لمفوض قضائي اهوَ غيبلغهم مباشرة وايلا قام بهاد العملية مبقا للبنكة مادير و كيما كيقول المثل المخير فخيلها تركبوا .
وبالنسبة للناس اللي الكونط ديالهم مفعل وخدامين بيه تلاتة دالأمور ما خصكومش تنساوهم انت كزبون خصك تتوفر على وثيقة تعاقدية بينك وبين البنك ثانيا مراقبة الاقتطاعات ومقارنتها مع العقد يعني ايلا كانت عندك امكانية ثالثا ايلا غيرتي مقر السكنى خصك تشعر البنك بالعنوان الجديد ديال الدار اللي نتا ساكن فيها .
تعليقات
إرسال تعليق