بوغطاط
اليوم غادي نهضروا على واحد الموضوع مهم كيشكل عائق لبعض الفئة من المجتمع اللي هو شلل النوم او بما يعرف ب بوغطاط، و قبل مانبدا انعاود ليك هاد البلان باش تفهم علاش كنهضروا ؟ واحد النهار حليتي عينك ففراشك كاتشوف فالباب كايبانو ليك جوج رجال واقفين، ماكاتشوفهمش و لكن .. عارفهم واقفين تما، و عارفهم كيفاش دايرين، كاتقدر تسمعهم علاش كايهضرو، كيهضرو على القتل، نتا .. ماكاتقدرش تتحرك، كاتغوت و لكن صوتك ؟ صوتك ماكاينش ؟ صدرك تقيل .. هاهوا واحد منهم فوق منك نيشان .. ماكاتقدرش تتحرك، شنو هادشي كايخرج منك؟ بوووم .." فقتي .. كان فيك بوغطاط ...
الأغلبية الساحقة دازو من تجربة بوغطاط أو شلل النوم و عبر التاريخ كانت هاد الظاهرة مرتبطة بالاشباح و شي كائنات كاتجلس فوق صدرك و كايمنع داك الشخص اللي ناعس من أنه يفيق، و لكن هادشي ماكايدخلش للدماغ داكشي لاش جبت مقال علمي خالص باش نفسر هاد الظاهرة المرعبة، واجدين ؟
علميا هاد الظاهرة سميتها (Sleep Paralysis) أو شلل النوم باللغة العربية، وهاد الحالة كاتوقع منين كاتوحل بين عالم اليقظة و عالم النوم، و كاتوقع هاد الحالة منين يالاه كاتحط راسك على المخدة و كاتبغي تنعس، أو بعدما تنعس بشي 5 دقائق و لكن غالبا تا كاتنعس عاد كاتوقع ليك هاد الحالة. كاتكون حاسة السمع و البصر خدامين مزيان، و لكن كاتكون مخلوع و كاتجيك هلوسة بحيث كاتسمع أصوات ماكاينينش و كاتشوف أشياء اللي ماكايناش!
كيفاش كايوقع بوغطاط ؟؟
باش نفهمو كيفاش كايوقع "بوغطاط" أو شلل النوم أو أيا كانت السمية ديالو فالمنطقة ديالك، خاصنا نفهمو كيفاش كانعسو و كيفاش دايرة عملية النوم.
النعاس مقسوم ل جوج مراحل رئيسية، NREM و REM، فالمرحلة الاولى ماكانحلموش، و فالمرحلة الثانية عاد كاتبدا تحلم (معنى REM هو Rapid Eye Mouvement) اللي هي بالعربية حركة العين السريعة، حيث أن حركة العين هي اللي كاتخلينا نشوفو الاشياء ف وسط الحلم، ايلا كنتي كاتحلم و هزيتي عينيك للسما "ف الحلم"، العين ديالك غادي تحرك تا هي للفوق و نتا ناعس، بالتالي هاد حركة العين السريعة بحال المحاكاة ديال الحركة ديال عينيك فالحلمة.
مرحلة NREM و REM كايتناوبو خلال النوم، كاتدوم كل وحدة 90 دقيقة تقريبا ثم كاتجي المرحلة الاخرى، كايتناوبو تا تفيق. و فمرحلة REM الدماغ ديالنا كايدير فينا خير كبير بحيث أنه كايفصل نفسو على العضلات الارادية باش داكشي اللي تشوفو فالحلم ماديروش فالواقع، تخيل معايا تكون هاز موس فالحلمة و تنوض ديرها بصح، ولا تكون كاتجري فالحلم و تنوض تضربها بجرية ماتحبس تال راس الدرب ...
دابا منين فهمنا النعاس، أجيوا نشوفو علاش كايوقع لينا بوغطاط .. شي مرات منين كاتفيق مشلول و ماقادرش تتحرك راك فقتي فمرحلة REM، المرحلة اللي الدماغ ماكايكونش كايتحكم بالعضلات ديال الجسم، أو الصوت أو أي حاجة من غير السمع و البصر اللي كايكونو سليمين.
شنو السبب ديال بوغطاط (شلل النوم) ؟
من خلال الدراسات و الابحاث و المقالات اللي قريت باش نكتب هاد المقال المُختصر، لقيت أن أبرز سبب باش يجيك شلل النوم هو منين تكون ناعس على ظهرك، داكشي علاش الناس كيمشيو غالطين كان كايسحاب ليهم واش كاين شي مخلوق جالس فوق من صدرهم !
أسباب أخرى :
1 - عدم الانتظام فالنعاس
2 - التوتر، الضغوط، و القلق
3 - تعاطي المخدرات، أو المواد المهلوسة بشكل عام
نعطيك نصيحة، ايلا كان كايجيك بوغطاط بزاف أو جاتك هاد الحالة شي مرة، منين تفيق منو، ماترجعش تنعس مباشرة حيت غايخلعك عاوتاني و عاود ثالث، نوض تمشى أو بقشش ف التيلفون واحد 10 دقايق، عاد نعس تاني.
تعليقات
إرسال تعليق