الكدبات الشائعة في كيفية النجاح في الحياة
كلشي باغي يكون متفوق و ناجح فحياته و لكن ماشي كولشي كايبغي يوصل لنفس المستوى ديال النجاح، كل واحد و المستوى اللي باغي يوصل ليه، و كيصادف أننا كلنا كانآمنوا بمجموعة من الكدبات على النجاح أو كيفاش نوصلو ليه لذلك قررت نقدم ليكم هاد سبعة الكدبات باش تحولوا تجنبوها و ماتبقاوش تآمنو بها.
الكذبة الأولى: ""خاصك تكون عارف الجواب لأي سؤال""
جوان بايز كتقول بلي ""قدما الواحد كيبحث، قدما كاتزيد المعرفة ديالو و كايجيو معاها الأجوبة"".
الناس الناجحين و المتفوقين فحياتهم ماعمرهم كايبداو بجميع الأجوبة،لأنهم كايتعلمو كيفاش يعرفو الأجوبة ديال الأسئلة اللي عندهم،أو بالأحرى كاتزيد المعرفة ديالهم. و فهاد الوقت،ولا من السهل جدا الإجابة عن أي سؤال كان و كيرجع الفضل إلى الأنترنت و وسائل التواصل.
بزاف دالناس نجحو فحياتهم و وصلو لداكشي اللي بغاو عن طريق التعلم من أخطائهم لذلك ماشي عيب أنك تغلط ،العيب هوا أنك تغلط و ماتعلمش من الأخطاء ديالك.
الكذبة الثانية: ""ما خاصكش ضروري تقوم بشي تغيير""
Narcotics Anonymous
كاتقول : "" الجنون هو انك تبقا تدير فنفس الحاجة و تبقا تعاود فيها و تسنى منها نتائج متعددة و مختلفة ""
و من هاد المقولة كانستنتجو بلي كاين فرق كبير ما بين الجنون و المثابرة، و خاصك تكون واعي باش تعرف بلي جا الوقت اللي خاصك تقوم بالتغيير، و باش توصل للمستوى ديال النجاح اللي باغي توصل ليه كتحتاج أنك تكون مستعد أنك تخرج من صناعة و تدخل فشي صناعة أخرى أو تبدل الصناعة ديالك يعني انك تكون مستعد تتأقلم معا التغييرات. و فالأخير، باش تكون ناجح و متفوق فحياتك، خاصك ضروري تقوم ماشي غير بتغيير واحد، و إنما تغييرات هيا.
الكذبة الثالثة : "" النجاح كايتحقق ما بين ليلة و ضحاها ""
بيونسي كاتقول :""ما عمرني تلاقيت شي واحد كايسهر و كايخدم كتر مني فالمهنة ديالي ""
من أشهر الكدبات اللي كانتيقو على النجاح هوا أنه يقدر يتحقق بين ليلة و ضحاها.
هاد الكدبة تبناتها وسائل الإعلام اللي ولينا من الضروري مانستعملوها فحياتنا اليومية،كلنا ماكرهناش نجحوا بين ليلة و ضحاها بلا عداب بلا والو و لكن هادي شي حاجة اللي مستحيلة و عمرها ما تحقق لأن النجاح كايبغي الوقت و الصبر و العمل الجاد و شويا ديال تمارا.
الكذبة الرابعة:""ماشي ضروري تقوم بتضحيات باش تكون ناجح""
أوبرا وينفري كتقول :"" يمكنلك يكون عندك كولشي، و لكن ماشي من الدقة لولا ""
اه،يمكن يكون عندك كولشي،يمكن تربح الملايين فالشهر،يمكن تسافر لخمسين بلاد فالعام، يمكن تقضي كل دقيقة مع عائلتك، يمكن تكون بصحة جيدة و تكمل حتى عشرة دالماراطونات، يمكن تدير جمعية و تحارب المجاعة و لكن ماشي كولشي فدقة.
حياتك عمرها ماغاتكون مثالية،خاصك تعرف باشنو غادي تضحي دابا باش يكون عندك اللي بغيتي و ماكتر من بعد، الأولويات ديالك غادي تبدل فكل مرحلة من حياتك لذلك ضروري تضحي بشي حوايج باش تنجح فحياتك.
الكذبة الخامسة: ""النجاح غايقضي على كاع المشاكيل اللي عندك""
جيم رون كيقول :"" ماتمناش يكون كولشي ساهل، تمنى انك تكون الأحسن. ماتمناش المشاكيل تكون قليلة،تمنى المزيد من المهارات. ماتمناش يكون التحدي قليل،تمنى المزيد من الحكمة""
الناس الناجحين ماشي ماعندهومش مشاكيل، و لكن كايعرفو كيفاش يتعاملو مع مشاكيلهم عن طريق إستراتيجية معينة و خاصة بيهم .المشاكيل ضروري ماتواجههم فطريقك إلى النجاح، و اللي هيا شي حاجة ماشي غريبة على الناس اللي نجحو فحياتهم ،باش نجحو و تفوقو فحياتهم : تعلمو أنهم يواجهو المشاكيل ديالهم واخا تكون كبيرة.
و بالتالي،كلما كنتي ناجح،كلما كتواجه مشاكيل كتر.ماتفكرش بلي ملي غادي تنجح ماغايبقاو عندك مشاكيل، بالعكس عاد ماغادي يزيدو و يكبرو و معاهم غاتكبر القدرة ديالك على التعامل معاهم و القضاء عليهم.
الكذبة السادسة :""الناس غايبغيوك كتر ملي غاتنجح""
مارلين مونرو كاتقول : ""النجاح غايخلي شحال من واحد يكرهك ""
شحال من مرة سمعتي أو شفتي الناس كايمدحو شي واحد اللي ناجح فحياتو؟
الناس الناجحين كيخليو الناس اللي ماناجحينش بحالهم يكرهوهم و يكرهو النجاح ديالهم لأنك كلما كنتي ناجح كلما تعرضتي للنقد السلبي،النجاح ديالك أيخليك تخسر صحابك، و لكن أيخليك تدير صحاب جداد اللي كايعيشو حتا هوما النجاح فنفس الوقت.
الكذبة السابعة :"" النجاح غايزيد يفرحك فحايتك ""
الكاتب زيغ زيغلار :"" الفلوس ماغاديش تفرحك""
الفلوس بصح تقدر تفرحك و تشري ليك شويا ديال السعادة، و لكن لمدة قصيرة فقط، و ماغاديش تدوم هاد السعادة.
السبيل الوحيد اللي أيخلي النجاح يزيد يفرحك هوا أنك تحمد الله على كل لحظة كاتعيشها سواء كانت زوينة أو خايبة، سواء كنتي نجحتي أولا باقي، عيش السعادة دابا و فرح دابا لأن النجاح ماشي هو اللي غايفرحك فحياتك.
تعليقات
إرسال تعليق