اضطراب الشخصية الحدية اولا Borderline personality disorder
اليوم غادي نهضرو على واحد الاشكال اللي غادي خربق ليك الفيزيبلات ديال دماغك سميتو اضطراب الشخصية الحدية اولا Borderline personality disorder، و قبل مانبدا انعاود ليك واحد البلان باش تعرف علاش كنهضرو ؟ كل واحد فينا عندو صديق عزيز عليه بزاف لدرجة انه كيعاود ليه على ادق التفاصيل ديال حياتو و المشاكل اللي كتواجهو بشكل يومي... يعني كيثيق فيه ثقة عمية! كيكون صعيب اولا شبه مستحيل انه يشك فيه. و هذا هو نفس الصديق اللي دوز معاك الحلوة و المرة لسنوات كثيرة و اللي عمرو خسرليك خاطرك اولا دار ليك شي حاجة خايبة... لدرجة وليتي كتعاود ليه على شي حوايج داركم و ما عارفينهاش عليك!
واحد النهار فقتي لقيتي راسك مكتحملش فيه الشعرة وليتي ما قادش تشوف خليقتو قدامك و حتى من ديك الثقة اللي كانت بيناتكم مابقاتش... ضربتي كلشي فالزيرو كَاع السينين اللي دوزتوها تسركيل و لعب و ضحك و نشاط... دمرتيها فلحظة. هادشي ما وقعش ليك غير مع صاحبك بوحدو وقع ليك حتى مع الناس اللي دايرين بيك و المحيط اللي نتا عايش فيه وليتي كاتكرهم كاملين... و العلاقات ديالك معاهم مبقاتش مستقرة كيف كانت قبل... بقيتي غادي على هاد المنوال حتى تسببتي ف انهيار كَاع العلاقات اللي كانت كتجمعك بهاد الناس و من ضمنهم صاحبك اللي كان عزيز عليك و هادشي كلو كان كيوقع و نتا مجايب للدنيا خبار! (بدون وعي منك) حيت مكنتيش واعي بيه من اللول. بالرغم من هادشي كامل و فنفس الوقت مكتقدرش تبقى بوحدك و كاتخاف من الوحدة و الانعزال و هنا كتولي مضطر انك تقدم تنازلات و تقدر دير اي حاجة باش الناس متمشيش و تخليك بوحدك و وخا دير هاد المجهود كامل و تحاول حتى تعيا مغاتوصل لحتى شي نتيجة! و فاللخر كتولي تلوم فراسك و كتلقى نفسك محتار و معارفش السبب ديال هادشي اللي واقع ليك ...
اضطراب الشخصية الحدية اولا Borderline personality disorder
هو اضطراب نفسي كيأتر على المشاعر و طريقة التفكير ديال الناس اللي كتصاب بيه، هاد الاضطراب خطير يقدر يدمر ليك النظرة اللي نتا واخدها على نفسك اولا الشخصية ديالك اللي كتاسبتيها هادي سينين... كيفاش ؟ بحال الى خدينا بنت زوينة فالمظهر الخارجي و كَاع الناس كيشوفوها هكا إلا هي كتحس بالدونية و انها مزويناش و كتبدا تصرف على هاد الاساس! و اخطر حاجة فهادشي ان لواحد كيحكَر راسو و هاد النظرة الدونية كتكون هي السبب ديال كاع المشاكل... و المصاب بهاد الاضطراب الى قلتي ليه مثلا نتا خايب غيبقى ديما يحتاقر نفسو حتى يولي يكره راسو و الناس اللي دايرين بيه و بالعربية غادي ولي حاقد ... و تقدر توصل بيه لدرجة انه ميبقاش يشوف فالمراية!
الشخص اللي كيتصاب بهاد الاضطراب كيبقى ديما يقدم تنازلات حيت هو كيتعامل مع الناس على اساس انه محكُور و مهمش ... وخا دير اللي درتي معاه عمرو مغادي ينهي ديك العلاقة، و هادشي كيخلي المعاملة ديالو مع الناس اللي دايرا بيه زوينة و كيحس باللي عندهم فضل كبير عليه حيت رضاو يتصاحبو معاه!
و هاد التنازلات اللي كيقدمها المريض مكتعنيش انه خايف يخسرك، لا، هو خايف يبقى بوحدو ... لدرجة الى كانت بنت مثلا مصابة ب Borderline و كتبغي شي واحد و خايفة انه يخليها شي نهار ... ممكن دير اي حاجة غير باش ميخليهاش بوحدها وخا يكون هادشي على حسب الاخلاق و المبادئ ديالها! ... ولا بحال شي واحد تاهو مصاب ب Borderline و كيبقى يغرق صاحبو ب Gifts اولا الكادُووَات باش ميخليهش بوحدو ...
اغلب المرضى اللي كيوقع ليهم بحال هادشي كيحساب ليهم واش الناس كتبغيهم و لكن هما معارفينش انهم خايفين لا تقتلهم الوحدة و الانعزال ... و المريض ب Borderline ديما المزاج ديالو كيكون متقلب بحال الطقس ههه! يعني مكاينش مبدأ الوسطية فالأحاسيس ديالو و كتلقى عندو بزاف ديال العلاقات و لكن مشي مستقرة، و هاد عدم الاستقرار كيكون بسبب المزاج المتقلب لي عندو ... يقدر يكون ناشط مزيان و عاجبو الحال و يقدر فنفس الوقت يكون كاعي و حاقد على الوضعية! و الناس اللي كتربطهم علاقة بهاد المرضى فالغالب كتكون مبنية على المصلحة و فاش كيقضو بهم غرض كيلوحهم لتوش (الباب الحباب) ...و هنا كيبداو عاوتاني من اللول يبنيو فعلاقات جديدة بحال الى عايشين فمتاهة معارفينش النهاية ديالها...
و دبا آجي ندخلو لصلب الموضوع و نعرفو شنو هي الاسباب اللي تقدر تجعل اي واحد فينا اعيش هادشي كامل ...
اول حاجة هي العامل الوراثي يقدر ينتاقل بين افراد العائلة الواحدة و العامل الثاني هي البيئة المحيطة... كتلقى هاد المريض تعرض فصغرو لصدمة كبيرة بحال حالة الطلاق بين واليديه اولا مات ليه واحد فيهم اولا الاهمال ... واش هاد المرض عندو مضاعفات ؟ الى كان واحد المزاج ديالو متقلب ما واتقش فراسو و ديما كاعي، و كيحس براسو محكُور مكيسوى والو قدام الناس، فاشل ... بطبيعة الحال غادي تكون عندو مضاعفات تقدر تفشل العلاقة ديالو مع مراتو لدرجة انه تقدر توصل الطلاق و دوك الوليدات مساكن غادي توقع ليهم صدمة و اللي فالغالب تا هوما غادي تصابو ب Borderline.
واش كاين بزاف دالناس مصابين بهاد المرض ؟
الى خدينا مريكان على سبيل المثال كنلقاو 1,6% من عدد السكان مصابين ب Borderline و بعض دالمرات تقدر توصل النسبة تال 5,9% و متجيكش عجب الى قلت ليك باللي البنات كيشكلو الغالبية ديال الناس اللي تصابو بهاد المرض!
واحد السيد سميتو Theodore Millon درس الظاهرة و قسمها لربعة دالانواع، اول واحد معانا سميتو The discouraged borderline و اللي كيكون فيه المريض متايقش فراسو و ديما مكتاءب و كيكره كَاع الناس و المحيط اللي هو عايش فيه، و النوع التاني سميتو Impulsive borderline و هو اللي كيخلي المريض يتصرف بتهور و كيكون مندافع بشكل مبالغ فيه يعني غير مدرم الريح اللي جات ديه! و كتلقاه ديما حاس بالملل و كيتدخل فالخصوصيات ديال الناس. تالت نوع سميتو The potulant borderline و هذا كيكون متشائم و عدواني فالتصرفات ديالو ميقدرش ادير شي حاجة لراسو ديما كيعتامد على الخراين، و النوع الرابع سميتو Self_destructive borderline و هو اللي مكيحملش راسو و كيحاول بجميع الطرق يدمر الشخصية ديالو سوى كان واعي بهادشي او لا، هذا اللي كيخليه يتكرفص على راسو ... بحالاش ؟ مثلا كتلقاه سايق الطوموبيل و هو كَاع ما مسوق بحال عاش بحال مات! و مكيهتمش بزاف بصحتو اولا المظهر الخارجي ديالو ...
واش Borderline عندو علاج ؟
كاين ما يسمى بعلاج السلوك الجدلي يعني تجيب المريض تجلس نتا وياه بجوج تناقشو فالأفكار ديالو و تحاول تصححها ليه و كاين جوج اخرين سميتهم العلاج السلوكي المعرفي و العلاج النفسي الديناميكي و لكن كيبقى العلاج اللول هو الابسط و الانسب ... اما بالنسبة للأدوية فهي حاليا كتعالج غير الاعراض ديال المرض بحال الاكتئتاب و المزاج المتقلب ...
دبا الى شي واحد قريب ليا فيه هاد المرض كيفاش نتعامل معاه ؟ اول حاجة خصك ترد البال لطريقة اللي كتهضر معاه بها باش متجرحوش و متخليهش يحس بلي هو محكُور ، تاني حاجة خصك تعرفها هي ان السلوكات ديالو كتكون عشوائية و ميقدرش يتحكم فيها... يعني الى بغيتي تعامل معاه مزيان خاص تكون صبار و تعطيه احساس بالراحة و انك غادي تبقى معاه و خا يوقع اللي وقع، اولا معرفتيش تكمل متصاحبش معاه نتا من اللول و هني راسك حيت الى بقيتي حتى اللخر و مشيتي غادي تسمى خدلتيه.
تعليقات
إرسال تعليق