صعود الصين ومستقبلها كقوة اقتصادية عظمى
اليوم غادي نهضرو على النهضة الاقتصادية في الصين و كيفاش ولات قوة عظمى تقارع الكبار من بعد ما كانت من افقر الدول في العالم ؟! اول حاجة خصك تعرفها هي ان جمهورية الصين الشعبية اولا الشينوا كما كنقولو عليها حنا قبل النشأة ديالها عاشت بزاف دالحروب أهمها الحرب مع اليابان في 1937 و الحرب الاهلية سنة 1946 بين الحزب الوطني و الحزب الشيوعي و اللي انتصر فيها هاد الاخير او وصل السلطة بقيادة ماو تسي تونغ . في 1958 الصين دارت محاولات باش تنتقل من بلد فلاحي للبلد صناعي و هاد البلان تعرف ب "القفزة الكبرى" ، و لكن النهضة الحقيقية غاتبدا في 1978 في عهد الرئيس دينغ شياو بينغ و ابتداءا من هاد السنة الصين غاتفتح اوراش متعددة و غادير اصلاحات اقتصادية كبرى اللي غيكون عندها تأتير ايجابي من بعد في صعود جمهورية الصين الشعبية نحو العالمية .
✅ نبداو #بالنهضة_الزراعية :
في سبعينيات القرن الماضي كانت كتر من ستين فالمية من سكان الصين كيعيشوا فالارياف هنا الدولة دارت واحد البلان واعر ، سمحت للفلاحين باستصلاح الاراضي و في المقابل الدولة تاخد واحد الحصيصة من المحصول، و داكشي اللي بقى عندهم الحرية يبيعوه فالسوق و هكا بالتدريج بقات الدولة غادية على هاد المنوال حتى حررت الاراضي الزراعية من سيطرتها و بقى الدور ديالها محصور في حماية الفلاحة عبر الحفاظ على الاسعار و تسهيل شحن و بيع البضائع مما ادى الى توسع الاسواق الزراعية اللي وصل العدد ديالها واحد وستين الف في 1986 .
✅ #النهضة_الصناعية_و_التجارية :
عممت الحكومة الصينية نمودج الاصلاح الزراعي باش يسمح لأي شركة اولا مصنع يبيع المنتوجات ديالو فالسوق الحر ، كما ان الشركات الصينية استخدمت فائض الارباح فتوسيع الاعمال ديالها .
انضمت الصين للبنك الدولي و صندوق النقد الدولي في 1980 و انشأت اربع مناطق تجارية في مدن مختلفة بأموال الضرائب باش المواطن يحس بلي عندو دور في البناء ديالها و في النهضة ديال البلاد كذلك ، و في 1990 غادي تأسس البورصة الصينية و اللي غادي يكون عندها دور كبير في ارتفاع النمو الاقتصادي لعشرة سنوات متواصلة بمعدل سنوي تجاوز عشرة فالمية هادشي اللي غادي يساهم في تحسين الوضعية المعيشية ديال خمسمية مليون صيني اللي خرجوا من براثن الفقر ، و في السنوات التالية تجاوز الناتج المحلي 11 ترليون دولار و تزاد احتياط النقد الاجنبي من 11,9 مليار دولار سنة 1985 الى كتر من 3,5 تريليون دولار في 2016 .
اليوم الصين كتعتبر اكبر مصدر و تاني مستورد في العالم و كتملك اقوى اربع بنوك في العالم كذلك ، و كتقدم قروض لدول عظمى و هاد الابناك كتملك اصول كتجاوز 2,5 تريليون دولار ، اما بالنسبة للتكنولوجيا شركة China mobile هي اكبر مزود لخدمات الهاتف المحمول في العالم بحوالي 835 مليون مستخدم و في 2016 تفوقت مجموعة Alibaba للتسوق الالكتروني على متجر وولمارت الامريكي كأكبر متجر للتجزئة في العالم ...
✅ #نهضة_البناء :
البنايات اللي شيدتها الصين في ربعين عام كتفوق كَاع دكشي اللي بناتو المريكان فالتاريخ ديالها و مع تزايد عدد السكان و الاكتضاض فالمدن الرئيسية، الصين خدامة كتبني فواحد المدينة عملاقة غادي تكون اكبر مدينة في العالم و ذلك بدمج تلات مدن في مدينة واحدة و المركز ديالها غاتكون هي العاصمة الادارية بكين و بتعداد سكاني كيفوق 130 مليون نسمة اي ما يعادل سكان مصر و السودان مجتمعين .
✅ #نهضة_المواصلات :
الصين كتهدف انها توصل السكك الحديدية للخمسة و تلاتين ألف كيلومتر و هذا غادي كون اكبر مشروع لبنية تحتية في تاريخ البشرية !
و الصين ايضا كتصدر تكنولوجيا القطارات السريعة لكل من تركيا و السعودية و امريكا الجنوبية و دايرا في المخطط ديالها تصدر للأمريكا و روسيا ...
باش تربط الشمال بالجنوب و الشرق بالغرب الصين بنات انفاق و جسور عملاقة و ابرز متال على ذلك هو نفق "بوهاي" اللي كيتعتبر اطول نفق في العالم و البناء ديالو كلف 42 مليار دولار ، و التفوق الصيني فهاد المجال جعلها تقتارح تنفيذ مشاريع عملاقة مماتلة بحال مضيق "برينغ" بين روسيا و امريكا .
✅ #الطاقات_المتجددة :
كتعتبر الصين دولة رائدة فهاد المجال و لتكريس صدارتها قامت بإنشاء "سد الممرات التلاتة" اكبر محطة لتوليد الطاقة الكهرومائية في العالم، كما ضاعفت الصين من القدرة ديالها في انتاج الطاقة الشمسية مية مرة في ظرف عشر سنوات و كاتمتلك الصين 21 مفاعل نووي لتوليد الكهرباء و بالرغم من الخطورة ديالو على البيئة و على عكس التوجه العالمي اللي غادي نحو تقليص الاعتماد على الطاقة النووية بعد كارثة فوكوشيما في اليابان الحكومة الصينية مامسوقاش و ناوية تكمل فهاد المسار بإنشاء 24 مفاعل نووي جديد في المستقبل ...
🔷️ #الريادة_قادمة 🥇 :
الصعود نحو القمة و ازاحة الولايات المتحدة الامريكية من الصدارة هو الهم الوحيد و الأوحد للحكومة الصينية ، فعليا امريكا مزال في القمة كقوة عظمى و انتزاع اللقب منها هو مسألة وقت فقط و لكن مشي ساهل حيت أمريكا كادير ما فجهدها باش دير العصة فالرويضة للصين عبر اختلاق ازمات و خنق الاقتصاد الصيني بفرض عقوبات ... و هادشي كامل حيت المريكان عندها تخوف من انها تخسر الصدارة لِصالح الصين اللي غادية و كتقلص في الفارق بواحد السرعة كبيرة و نهار على نهار كتقرب توصل للهدف اللي سطراتوا هادي خمسين عام و التاريخ الموعود حسب الخبراء هو 2030 و الصين حاليا هي اكبر منتج و مصدر في العالم و من المتوقع ان الناتج المحلي غادي يوصل 26 تريليون دولار .
خاتمة
🔶️ الصين تبنت نمودج مختلف على النمودج الغربي للدولة القومية و هو الدولة الحضارية حيت كتعتبر الوحدة قيمة سياسية عليا تؤدي فيها الدولة دور الممثل و الحارس للحضارة الصينية الممتدة في التاريخ .
تعليقات
إرسال تعليق