الموتيفاسيون احساس كتحس بيه من خلالو كتكون متحمس انك دير شي حاجة، وبما انها احساس فهي عندها علاقة مباشرة بال psychology ديال الانسان... داكشي باش خليونا ناقشو هاد الموضوع من الجانب النفسي...
ادوارد ديسي استاد فعلم النفس، تشهر بواحد النظرية ديالو ديال self-determination و اللي كتعتابر بمثابة تجديد وتحديث لنظرية الغني عن التعريف ابراهام ماسلو، و اللي كتنص على انه الموتيفاسيون ديال الانسان كتجي من اشباع الحاجيات النفسية، البيولوجية، الأمنية ...الخ، فعلا ولكن ادوارد كيعتابر على انه كاين نوعين من التحفيز :
الاول هو controlled motivation وهو هداك التحفيز اللي كيجيك من برا، و اللي عندو علاقة بالاشخاص مثلا، انما المشكلة ديالو هي انه كيخليك حاس بالتوتر والضغط، وكيخلي ديما المصير والحركية ديالك مرتبطة بهادوك الاشخاص، ومهدد بالفشل في اي وقت، علاش ؟ حيت مصيرك مقترن بشخص او بشيء.
الثاني هو autonomous motivated و اللي كيقصد بها التحفيز اللي كايجيك من لداخل، ومن خلالو اولا كتعرف واش عندك اهتمام بداكشي اللي باغي دير ؟ واش عندك الخبرة والمعرفة والموارد باش دير داكشي اللي باغي دير ؟ واش داكشي اللي باغي دير ايخدم لك ؟ واخيرا واش داكشي اللي باغي دير يستاهل الوقت والجهد اللي باغي دير عليه ؟
جميع الدراسات النفسية اللي دارت فهاد المجال كتبين على انه النوع الثاني هو الافضل بكل المقاييس، حيت هاداك التحفيز نابع من الداخل ديالك، ممحتاجش تشوف سيارة ديال شي واحد في فيديو باش تموتيڤا، وممحتاجش تشوف الڤيلا ديال فرتلان باش تموتيفا، وايلا جا شي نهار مابقاش داك الفيديو شنو ادير ؟ نهار يجي الزلزال لا قدر الله وطيح ديك الڤيلا اش غايبقا ليك اللي يموتيفيك ؟ فكر مزيان، حيت الى كانو الاشخاص كيموتيڤيوك، فعلاش ما اختاريتيش انجح الاشخاص في العالم ؟
ولكن في المقابل نتا محتاج تجلس مع راسك وتشوف واش متوفرين فيك الشروط في الداخل ديالك باش دير داكشي اللي باغي ديرو، تخيل راسك فصحراء بوحدك، شكون ايحفزك الى محفزتيش راسك ؟
تعليقات
إرسال تعليق