كيفاش نحقق إنجاز كبير فحياتي ؟
أولا نحاول نختار هدف ولا مهنة ولا خدمة تكون كتوفر فيها ثلاثة المعايير: ( الحب+ الكفاءة+ الفرص)
باش تعرف هاد المجال حاول تجاوب على هاد ثلاث الأسئلة:
1- شنو هو المجال اللي تنبغي بزاف و باغي حياتي كاملة نستمر نخدم فيه ؟
2- واش عندي الكفاءة فهاد المجال اللي تنبغي أو مستعد نخدم عليها و نطورها ؟!!
3- واش هاد المجال فيه فرص للنجاح و فيه المنافسة قليلة ؟!!
دير فبالك واحد الحاجة مهمة بزاااااف وهي:
{ أن الحب و الكفاءة ماكافيينش إيلا ماكانوش فرص النجاح }
- إيلا كان نعم هاد المجال اللي اختاريت كتوفّر فيه هاد المعايير الثلاثة، فأنت تتحتاج جوج حاجات باش تنجح:
- أولا: التركيز 100% ، ماشي 50% ولا 80% ، بل خاصك التركيز 100% على المجال اللي اختاريتي. وبلا تركيز مركّز مزيان راك غالبا ماغادي دير والو. لأن التركيز من أهم الأسباب اللي كتساهم فالنجاح ديالنا، والتركيز هو توجيه الطاقة ديالي كلها نحو هدف محدد أو مهمة معينة، ونتوجه مباشرة لهاد الهدف بدون إلتفات يمين أو يسار حتى نكملو
٪.
- غادي تقول ليا مافيها باس نحقق بزاف ديال الأهداف فنفس الوقت ؟!!
- أه مافيها باس و ممكن، ولكن غادي تساهم فتشتت الإنتباه ديالك و غالبا ماغاديش تكون نتيجة كبيرة فالأخير لأنك فرقتي الطاقة و الجهد ديالك على عدة أهداف، كل هدف كتعطيه شوية. كيفما كتقول المقولة المشهورة: " اللي بغا يجلس على جوج كراسى كيطيح بيناتهم"
- ولهذا من الأحسن تخدم على كل هدف بوحدو حتى تسالي منو و دوز لشي هدف آخر.
كيفاش يكون عندك التركيز 100% ؟!!
1- أولا ملي تبغي تبدا الخدمة على الهدف ديالك حيد أي حاجة من قدامك اللي ممكن تسبب لك بالإنقطاع عن الخدمة وتشتت الانتباه. بما في ذلك: حاول تحط الهاتف على الوضع الصامت، إغلاق الباب و النوافذ باش تجنب الصداع من الخارج ، حط قدامك قرعة ديال الماء و العصير ولا القهوة، وقبل ماتبدا حط قدامك أي حاجة ممكن تستعملها فالخدمة ديالك.
2- ثاني حاجة باش تبقى خدام على الهدف ديالك بتركيز مركز 100%، هي تجنب نظرة الآخرين و آرائهم و معتقداتهم بخصوص هادشي اللي خدام فيه. بما في ذلك رأي الأصدقاء المقربين و الإخوة و الوالدين و العائلة... لأن الضربة تتكون موجعة بزاف من الناس المقربين، و دير فبالك أن كل واحد ورأيه الخاص اللي مرتبط بالتجارب اللي عاش و مر بها... بلاصت ما يعاونك غادي يفشلك... داكشي علاش حاول تعرف من عند شكون تاخذ النصائح و المعلومات و الحلول على المشاكل ديالك، ماشي من والااا خوذ منو النصائح و الحلول و التوجيهات، فكيفما ملي كتمرض بالضرسة كتمشي فقط عند طبيب الأسنان، حاول ملي يكون عندك شي مشكل قصد أصحاب التخصص فقط. لأن شحال من واحد عن حسن نية أو سوء نية يصدق: باغي يكحّل ليها صدق عامِيها.
3- ثالث حاجة هي أنك غادي تعاني بزاف بزاف بزاف عاد غادي توقف على رجليك، غادي يجيك الإحباط و الإحساس بالفشل، غادي تقول ياكما أنا غير تنخربق و تبدا تفكر تحبس و تستسلم و تبدل الضومين. غادي تبقى خدام شهور و شهور وتقدر توصل لسنين و نتا ما تاتربح والو فالفلوس، بل نتا اللي تاتخسر الفلوس باش يتحقق الهدف أو يستمر المشروع الحياتي ديالك. ويااااااك تتراجع ولا تبدل الضومين، غير استمر و طور المهارات ديالك بالقراءة و الدورات و التطبيق العملي. فالمسألة نفسية بامتياز و كلما كنتي متفاءل و تتحفز راسك براسك كلما تغلبتي على الأفكار و الواقع السلبي، وتذكر دائما لاربح بدون ألم No pain No gain.
حتى شي حاجة ماكتجي ساهلة، كون كان النجاح ساهل كون كانو كل الناس ناجحين فحياتهم. وحاول دير فبالك أنه: "من كانت له بداية مُحرقة، كانت له نهاية مُشرقة."
ثانيا: الإنضباط وهو دير داكشي اللي خاصك دير، فالوقت ديالو، سواء كان عاجبك الحال ولا ماعاجبكش، سواء كانت راشقة ليك ولا لا. فالدراسات تؤكد أن الناس الناجحين كتكون عندهم إرادة و عزيمة قوية للنجاح، كتخليهم يضغطو على راسهم باستمرار و يضحيو بالراحة و المتعة الحالية باش يحققو نتائج كبيرة و يوصلو الأهداف ديالهم. يعني عندك واحد الهدف خاصك تخدم عليه يوميا كل نهار شوية حتى يتحقق إن شاء الله.
- وفنفس السياق باش تكون خطواتك مباركة و موفقة حاول تشبت بالله و سنة الرسول عليه الصلاة و السلام، ثم عاشر الناس الإيجابيين و اللي تيفكرو بحالك و تجنب ما أمكن المحبطين... و استثمر فذاتك بالدورات التدريبية فالضومين ديالك باش تكون خبير محترف فالمجال، وتكون نتا الرقم واحد اللي الناس كلهم تيقلبو عليه و مستعدين يحطو الفلوس الصحيحة باش يقدم لهم الخدمات ديالو...
تعليقات
إرسال تعليق