الشوبينغ
كلنا كنعرفوا بلي الإناث مختالفين بشكل كبير في الشوبينغ على الرجال، هاد البلان عندو سبب مجاش غير هكاك، و هادشي اللي غانحاول نشرح ليك فهاد المقال ...
اللي خاصك تعرف هو ان فالوقت فاش كاتبغي تاخد قرار ديال انك تشري شي حاجة، الدماغ ديالك كيدخل وكيقرر فبلاصتك شنو اتشري ولا كيفاش ولا علاش اتشري ... ال neuroscience عندو علاقة وطيدة باتخاد القرارات، والاختلاف اللي كاين بين النساء والرجال في قضية الشوبينغ، سببو هو الاختلاف اللي كاين في البنية ديال الدماغ ديالنا ... بحيث انه الدماغ مكون من جوج ديال الجوانب، أيمن وأيسر، مبين هاد الجوج كاين واحد القناة عصبية مكونة من ألياف و اللي كتسمى corpus callosum هاد القناة كتعتبر صلة وصل بين الجانبين، يعني هي اللي كتبرونشيهم فبعضياتهم، الاختلاف كاين فأنه هاد القناة عند الاناث عريضة ب 25 في المئة على ديال الرجال، الشيء اللي كايعاونهم في انه يخدمو كلا الجوانب في عملية الشراء عن طريق تداخل ديال المعلومات بين الجانبين، عكس الراجل اللي كيخدم غير الجانب الايسر ... ولكن اشنو هو الفرق بين الجانبين ؟
الجانب الأيسر عند الجميع هو المسؤول على تحليل الاشياء بشكل منطقي وعقلاني، اما الجانب الايمن فهو المسؤول على تحليل ال visual وكدلك ال context اللي نتا فيه، يعني انه الراجل كيشري بشكل منطقي وعقلاني عكس المرأة اللي كتميل للجانب العاطفي ... كيما بينات الدراسة اللي دارو scientific american.
الرجال كيشريو باش يحققو واحد ال mission، يعني كيخرج من الدار، نيشان للمحل اللي بغا ياخد منو كياخد داكشي اللي فكر فيه، وكيرجع. عكس النساء اللي شوبينغ بالنسبة ليهم هو اكتشاف، وهدا هو السبب علاش النساء كيخرجو وفبالهم مغايشريو والو، وكيصدقو شاريين، او انهم خارجين يشريو حاجة محددة، وكيصدقو شاريين حاجة اخرى لا علاقة مع شنو بغاو، او انهم كيشريو شي حاجة اللي عاجباتهم في المحل، ومكتبقاش كتعجبهم في الدار (باسم الله الرحمان الرحيم)، او انهم كيخرجو باش يشريو وكيصدقو مشاريين والو من بعد 4 ساعات ديال الدوران، او انها كتمشي مع صاحبتها توريها شي محل شرات منو، كتصدق صاحبتها مشارياش وهي اللي شاريا، او كتلقا الماريو ديالها عامر وكتقول معندي مالبس ... والحالات عديدة، وهادشي كولو بسبب الدماغ اللي كيبروسيسي الاشياء عندهم بشكل عاطفي.
هادشي خلا شركات كبار كيغيرو من شكل موقع الايكومرس ديالهم على حسب واش امرأة او راجل اللي باغي يشري، يعني انه كيوفرو منصة كتماشى مع العقلانية والمنطقية ديال الراجل في اتخاد القرار، ومنصة كتماشى مع العاطفة ديال النساء، الشي اللي كيخلي نسبة التحويل تكون مرتفعة ...
تعليقات
إرسال تعليق