علاش مانطبعوش الفلوس بزاف
كيد غادي تكون شي مرة سولتي راسك ولا شي واحد هاد السؤال: بما أن الفلوس كاتعتبر اشياء مادية و مصنوعة، علاش مانبقاوش نصايبوهم و نطبعوهم، و هاكذا غادي نوليو لاباس علينا!
بطبيعة الحال، الجواب للي كانلقاو دائما هو "لا"، إلا أنه الأغلبية ماكاتكونش عارفا علاش. و ليوما غادي نفسر ليكم بالتفصيل علاش لا...
غادي نبدا ملي بدات التجارة في القديم، بحيث أنه كانت فقط عبارة عن مقايضة و تبادل للسلع. هاد الطريقة التجارية كانت مفيدة و مزيانة بطبيعة الحال، إلا أنه كان فيها واحد المشكل و اللي هو: ايلا كانت عندك السلعة كثيرة باش تبادل فهادشي ماكايعنيش انك لاباس عليك و غني، لأن المقايضة كانت كاتعلق باحتياجات و متطلبات الأطراف اللي داخلة فهاد التجارة، كمثال: أنا عندي القمح و نتا عندك البطاطا، نتا محتاج للقمح اللي عندي و لكن أنا ماعندي ماندير ب بطاطا اللي عندك... هنا غادي توقف التجارة بيناتنا .
داكشي لاش الإنسان ولا كايفكر في البديل، و هادشي جا مع اكتشاف المعادن النفيسة و بالأخص: الذهب. اكتشاف هاد المعدن كان عبارة عن ثورة بالنسبة للبشرية ككل في جميع المجالات، بحيث انه في المجال التجاري و اللي كايهمنا، ولا الذهب عبارة عن عملة كايتم تداولها في العالم كامل و اللي كاتمكنك من انك تنخارط في اي تجارة بغيتيها... بمعنى آخر، ايلا كان عندك الذهب كتير، راك كاتسما لاباس عليك، لأنه على غرار السلع العادية، كلشي محتاج لهاد المعدن.
و لكن، كان واحد المشكل حتى مع هاد الطريقة التجارية و اللي هو: فهاداك الوقت، كان هناك مايعرف بالقوافل اللي كاتمارس التجارة، و كانت كاتمشي لمسافات طويلة و معزولة و غير آمنة، داكشي لاش كانو غالبا ماكايتعرضو للسرقة و الاعتداء من طرف قطاع الطرق اللي كايقصدو هاداك الذهب المحمل من طرف القوافل. هنا فين ولينا كانفكرو في اننا نتاجرو بلا مايكون ضروري اننا نهزو معانا داك الذهب... وهنا، فين بانت الفلوس اللي كانعرفو دابا. خاصك تعرف بلي الفلوس اللي كاتهز معاك راها ماعندها تاشي قيمة، الدور ديالها هو أنها بحال وثائق كاتشهد من خلالهم الدولة أنه عندك هاداك القدر ديال الذهب مخزون، و أنه انت قادر انك تقوم بهاديك التجارة اللي باغي دير... كمثال، نتا عندك 200 درهم و أنا عندي 100، ايلا صرفناهم لذهب غادي تكون عندك كمية اكثر مني، ببساطة.
نفس المثال كينطبق على الدولة، حيث المغرب مايقدرش يبقا يطبع لراسو في الفلوس حتى يشبع لأنه ببساطة خاص يكون عندو المقابل ديال دوك النقود كمخزون من الذهب. غادي تقول ليا و شكون غايحبسو؟ بالطبع تاواحد ماغايحبسو، و لكن غادي يتخلق ليه مشكل آخر و اللي هو التضخم.
ايلا المغرب طبع الفلوس بزاف، غايولي كلشي لاباس عليه، و الحاجة ملي كاتكتر ماكاتبقاش عندها قيمة... داكشي لاش ملي المغرب غادي يبقا يطبع الاوراق النقدية بدون التوفر على مقابلها من الذهب، غادي عاني من التضخم، و الفلوس ماغاتبقاش عندها قيمة، و بالتالي، غادي تولي ايلا بغيتي تشري مسمار، غايكون خاصك برويطا ديال الفلوس
تعليقات
إرسال تعليق