الحفيز
الإنسان بطبعه عزيز عليه يكون ضحوكي أو ما يسمى 'بقشابي' خاطرو واسع كيف كانقولو. لكن كل واحد و درجة الضحك اللي عندو، كاين واحد النوع اللي دائما كايضحك و من أي حاجة يقدر يصنع نكتة المهم مادوزش اللحظة بلاما يدير شي حاجة كاتضحك، و غالبا كايكون هو ذاك الشخص اللي قلبوا كبير و نية. حتا لهنا مزيان لكن ! كايجيو مواقف أو أشخاص كايدخلوا لحياتنا أو مثلا كانشوفو شي وحدين كيفاش كايتعاملوا . . و كانحاولوا نتعاملوا بحالهم و غالبا هاد النوع ديال البشر كايكون ذاك اللي ماكيبينش الضحك ديالو و لقشابة اللي عندو و ماكيضحكش بزااف و كايحاول يكون مثالي لأقصى الحدود أمام الناس و فأي بلاصة مشى ليها . و هنا الشخص اللي ضحوكي بزااف (الشخص اللي هضرت عليه فالأول) كايتأتر بهاديك الشخصية المثالية و المرفوعة أكثر من اللازم و خصوصا ايلا كان شخص ضعيف و معندوش شخصية قوية .
• المزاح أو 'لقشابة' هي موهبة فحد ذاتها، لأنه نتا بذاتك كاتخلق جو رفاهي جو مليء بالفرح و تقدر تكون نتا سبب ديال فرحة شخص حزين أو نتا اللي كاتعطي واحد الإنطباع جميل على الحياة أمام واحد كايشوفها غير نكد و مشاكل و أزمات . . سواد في سواد ! لكن كاين نوع من الناس اللي بكثرة ما فيه الضحك و المزاح كايكون قلبو كبير و نية و كايكون ضعيف الشخصية . و و هاد النقطة بالضبط هي اللي بغيت نركز عليها .
الشخص 'الضحوكي' فاش كايتلاقا مع واحد مترفع و ماكيضحكش بزااف لدرجة أنه كايبان ليه مثال للمثالية، و كايولي يحس براسو تافه، و هنا كاينقص من نفسوا و كايقول هذاك إنسان مثالي مثقف ثابت ماكيضحكش بزااف داير قيمة لراسوا . . واو الناس كايبغيو يهضرو معاه ياه الناس كايحاولو يقربو ليه . . الخ حتى كاتكون واحد الفكرة فعقل داك الشخص 'الضحوكي' بانه هو شخص تافه و معندوش قيمة !
و كايولي كيفكر انه يتغير و حتى هو يولي مثالي بشكل كبير و يدمر ديك الفرحة اللي فيه و هنا كيدخل فمتاهة كبيرة ديال شخصية مزيفة ماشي شخصيتو الحقيقية و كايولي كايكبت ديك الروح المرحة ديالو و كاتنعادم عندو الضحكة و كايحاول أنه حتى هو يترفع و يكون شخص "مثالي" .
في حين أنه المثالية اللي خاص أي واحد يعرفها اشنو هي بالضبط، هاد المثالية تكمن فتعاملك بشخصيتك ب زيرو تصنع ! المثالية الحقيقية هي أن تصرفاتك كلها ديالك 100% و ماشي استوحيتها من شخص آخر و حاولتي تقلدوا !
• و هاد الظاهرة، كاينة بزاف عند البنات بحيث أنه البنت كاتكون طبيعية بجمالها الا أنها بضعف شخصيتها كاتولي حتى هي تتعاند مع هذه و هاذيك . . كاتولي تقول لا انا مازويناش ! خاصني نتغير خاصني ندير حتا أنا ... و نغير من المظهر ديالي باش نكون بحال 'فلانة' .
•• خلاصة القول، و هي أن الانسان ماعمرو كايعيش مرتاح و غايجي واحد النهار و غادي تعيا من كونك شخص متصنع و غاتلقا راسك كاتبدل مجهود فالفراغ و نتا متقمص شخصية ماشي ديالك، صحيح الانسان بضحك ديالو بتعاملوا مع المظهر ديالو و بتعاملات ديالو بشتى أنواعها فهاد المجتمع خاصها تكون كيف كانقولو بلقياس و كل شيء في حدوده، لكن ماعمرك تحاول تدمر شخصيتك و روحك المرحة و جمالك الطبيعي باش تبان مثالي لأنه المثالية تكمن فالجوهر الحقيقي ديالك و ماشي فداكشي اللي كاتكتاسبوا من الآخرين و يصنع منك شخصية وهمية.
تعليقات
إرسال تعليق