الذكاء الإصطناعي(Artificial intelligence)
الذكاء الإصطناعي(Artificial intelligence) هو و بكل بساطة الإمكانية ديال أي آلة في التصرف بدون تحكم من اليد البشرية و بالعربية هو مجال في المعلوميات كايهدف أنه يرجع المشقوف يفكر بحال بنادم، و لكن كيفاش يمكن للذكاء الإصطناعي يبدل العلاقات بين البشر ؟
حاسوب ذكي إصطناعيا إمكن ليه يتدخل لحل المشاكل اللي كاواجهها Software ديالك، يمكنليه يتحكم في روبوت بدون أي تدخل مباشر منك. وأيضا يوفر للGamer خصم يتحداه فأي لعبة فيديو!
الذكاء الاصطناعي الأكثر تطورا و رقيا يمكن ليه يتفاعل و يتواصل مع الإنسان بلا حتى شي مشكل. المعيار الذهبي ديال هاد النوع من التفاعل، هو Turing Test، و المفاد ديالو هو أن أي آلة ذكية كاتقدر تولي مطورة و راقية لدرجة أن الأغلبية ديال البشر مايقدروش يفرقو بينها و بين إنسان عادي .
مازال ماوصلنا لهاد المستوى، ولكن نحن في الأفق!
الذكاء الإصطناعي كان تبنى سابقا على أساس أنه قادر يكمل المحادثات البسيطة معنا و أيضا يقلد الحالة النفسية ديالنا.
من بعد ما صنعنا آلات قادرة تحاكي الإنسان في عدة جوانب ولكن فنفس الوقت مقيدة بالرغبات ديال الانسان، كايبقا على حسب وجهة النظر ديالك يا هدشي كامل، مثير و مشجع، أولا مخيف و واقع كئيب ...
شنو غايوقع إيلا إنسان عادي كانت عندو إمكانية التحكم بآلة كتشبه للإنسان وغادير اللي تقال ليها ؟
حنا مازال ماوصلنا ولكننا أقرب مما يمكن أن تتصور!
وفقا ل Huang، اللي هو المدير التنفيذي ديال Nvidia* و حسب ماقال: اللي خلا هادشي كامل يتحقق هو "التعلم العميق" أو deep learning و هو طريقة كتوضح للحواسيب كيفاش يتعلمو بوحدهم و ينميو البرمجة الأصلية ديالهم.و كيوصف deep learning كطريقة لحل مشكلة اللي من ديما كانت عائق على مبرمجي AI، واللي هي التعرف على الصور "Image Recognation"، باختصار كيتعلم غا بوحدو كيفاش يستعمل مجموعة من المعلومات و الحسابات" كما قال Huang "إيلا بقيتي مثلا كتوريه تصاور ديال ليمونة، مع الوقت غادي يبدا يعرف شنو كتعني بالليمونة، أولا شيواوا vs لابرادور vs مهر ".
هادشي كيشبه لحالة ديال طفل صغير فاش كايتعرف على العالم من حوله، كيشوف الأشياء، كيعرف شناهيا، كيعرف أوجه الإختلاف و الشبه بيناتها، و من بعد تيصنفها لأقسام.
أساسا هاد الروبوتات كتعلم تفكر بوحدها.
دبا هاد النوع ديال AI ولات عند كل واحد وظيفة مختص بها ( وحدين مختصين بالقيادة، وحدين مختصين بالشطرنج أولا الخطابات...إلخ )
ولكن الشيء المؤكد هو أن واحد النهار أيجي شي واحد و يجمع مختلف الموديلات ديال AI ويجمعهوم كاملين باش يشكل شي حاجة جديدة علينا تماما: مثلا شي شخصية اصطناعية اللي كتفاعل مع الناس بطرق غير متوقعة!
نهار غايوقع هادشي، النطاق ديال التفاعلات المحتملة غيتنوع ويولي تقريبا بحال التفاعلات الإجتماعية بين بنادم. وماكاين تا شي سبب علاش روبوت ذكي ماغاديش يسمع للنوع دالموسيقى اللي كيعجبك، ومن فوق هادشي يستعمل التعلم العميق باش يعرف النوع اللي كيعجبك، و يقلب على آلاف الأغاني اللي يقدرو يعجبوك.
روبوت ذكي يمكن ليه يقرر باش يشريليك الموسيقى اللي كتعجبك بعدما تأكد أنه يمكن لك تخلصها من الحساب البنكي ديالك. و غالبا ماغايهديها ليك فشي مناسبة اللي كتهمك بحال عيد ميلادك ...
هاكا يمكن ليك تجمع المعلومات و القرارات ديالك و دخلها فروبوت اللي شريتيه باش يرافقك.إوى تخيل مع راسك كيفاش غاتكون العلاقة ديالكم، سواء كانت صداقة، أو علاقة ...
و هكا أتلقا راسك مع رفيق اللي:
- ماعمر ماكيدوز عليه شي نهار خايب.- ماعمرو مايطلب منك شي حاجة.- كايعرفك كثر مما كتعرف راسك.- ماعمرو يقولك "لا" على شي حاجة بغيتيها.- غايبقا معك حياتك كاملة، و يمكنلك طفيه و تشعلو وقتما بغيتي.
الكلمات الصعيبة :
AI :
هي اختصار لكلمة Artificial Intelligence اللي بالعربية هي الذكاء الاصطناعي .
Nvidia :
هي وحدة من أكبر شركات المتخصصة فالمعالجات الرسومات وبطاقات العرض المرئي ومجموعات الشرائح للكومبيوتر وأنظمة ألعاب الفيديو (إكس بوكس، سيجا ساترن، بلايستايشن 3). وتسمى شركة بدون مصنع وبدون معدات تصنيع .
تعليقات
إرسال تعليق