تحديات ما بعدا البكالوريا؟
باقا مدة ديال شهر تقريبا و تبدا القرايا، عاوتاني الكتوبا، الدفاتر، المقررات، اللوازم المدرسية و زيد و زيد... و لكن بلاتي، نتا كنتي فالباك؟ و هاد العام داخل على التعليم العالي؟ نسا هادشي كامل اللي قلت ليك! حيت راك غادي تولي تحتاج غير دفتر و ستيلو ازرق .
فهاد المرحلة كيدوز عندكم واحد الموجه للمدرسة ديالكم، و كيقول لكم السمية ديال المدارس و المعاهد العليا، و كيشرح ليكم كل وحدة و المعدلات اللي كاتطلب و حتى نوعية القراية اللي فيها، و... صافي.
و لكن، واش كيدوي ليكم على الحياة من بعد الباك كيفاش كاتولي؟ و على التحديات الجديدة اللي كاتواجهها خصوصا ملي كاتعزل على عائلتك و مدينتك؟ و زيد و زيد؟ محال، و هذا هو منين كايبداو المشاكل عند الطالب المغربي، خاصو حتى يمر من التجربة عاد يفهم و عاد يتأقلم مع الظاهرة... للأسف.
داكشي علاش انطلقت من تجارب خاصة لبعض الأصدقاء، و قررت انني نهضر ليكم شويا على هاد التغيير الجدري اللي دازوا منو ملي انتقلوا للتعليم العالي.
كاين فيكم اللي غايبقا حدا واليديه، غايقرا في نفس المدينة و غايبقا يحس بحالا راه مازال في الثانوية. من حسن حظه، غايفيق و غايلقا لفطور موجود، غايجي مع 12 و غايلقا الغداء في الطابلة، و نفس السرير اللي كان كاينعس فيه داك العام هو اللي غايبقا ينعس فيه هاد العام، و كلشي على ما يرام... و لكن، هاداك اللي غايكون خاصو يمشي يسكن في مدينة اخرى باش يكمل قرايتو، كيفاش غادي يدير؟ بعيد على عائيلتو، و يقدر انه يشوفهم غا من العطلة للعطلة.
انا ماغاديش نعطيك وصفة سحرية باش تواجه التحديات اللي غاتصادف، و لكن غادي نوريك لاياش كاتشبه و كيفاش كاتكون، و انطلاقا من هاد المعطيات كاملة اللي غادي نعطيك، غادي تقدر انك تخطط ليها بطريقتك.
نبداو انطلاقا من واحد المثال بسيط: نتا كاتسكن بعيد على عائلتك، فقتي الصباح شربتي كاس ديال اتاي، و من بعد مشيتي للجامعة... خاصك تعرف بلي هاداك الكاس اللي شربتي بيه، ايلا ماحركتيهش نتا من بلاصتو، راه غايبقا تما الى ان يرت الله الارض و ما فيها. ايلا مافقتيش بوحدك، راه ماكاينش اللي غايفيقك. ايلا ماوقفتيش و صاوبتي الماكلة ديالك بوحدك، غاتبقا بالجوع حتى تنوض نتا. ايلا ما جمعتيش الدار اللي ساكن فيها، غادي تبقا عايش في الوسخ حتى دير النفس و تنوض تجمعها. ايلا مانضتيش باش تخلص الكهرباء و الماء، غادي يقطعوهم عليك... يمكن انك قدرتي تخايل هادشي مزيان، او لا؟
كاينين بزاف ديال الافكار اللي خاصك تمشي بيهم من هنا عارفهم، بحالاش؟ خاصك دير في بالك بلي اغلبية المغاربة ( ماشي كلشي!) عندهم في بالهم واحد الصورة نمطية ديال الطالب: كايتخايلوه بحال هاداك العنصر المشاغب اللي ديما كايجيب المشاكل للعمارة و للجيران، كايتصرف بطيش و ماكايحتارمش الجيران ديالو... طبعا واخا نتا مادايرش هاكا، هما غايتخايلوك هاكا حيت ماخاصكش تنتاظر منهم انهم يبدلو مجهود باش يعرفوك. بمعنى آخر، ايلا شي مرة كنتي نازل في الدروج و تلاقيتي مع شي جار و دار فيك شي شوفة ماشي هي هاديك، تفكر هادشي اللي قلت ليك، و ماتخليهش يأثر على النفسية ديالك لانك ملي غاتكون بعيد على داركم، ماغاتلقاش لمن تشكي، و غاتبقا مبرزط و غادي يأثر ليك هادشي على قرايتك.
اي واحد كايبعد على المحيط ديالو كايضعاف و كاتنقص القوة الداخلية ديالو، و يمكن تسمح لأي حاجة توقع ليك، الا هاد القضية! و لكن، كيغادير؟
ساهلة، حاول انك تصنع لنفسك محيط ثاني فهاديك المدينة اللي غادي تقرا فيها، تعرف على ناس، انفاتح بذاتك على بنادم اللي كايقرا معاك و جعلهم قراب ليك باش ماتحسش بالوحدانية و باش تحس بهاديك القوة اللي كنتي كاتمتع بها ملي كنتي مع عائلتك... و ماتنساش بلي في الاتحاد قوة، راك ماغاديش تقدر تواجه مدينة كاملة جديدة عليك بوحدك.
تالث شيء خاصك تمشي عارفو، هو انك غادي تكون معرض لمجموعة ديال الخيارات الفردية اللي ماغاتلقاش الوقت باش تناقشها مع شي واحد، اهمها: المسائل المتعلقة بالفلوس و المصروف.
ملي الوالدين ديالك غايصيفطو ليك الفلوس ديال الاسبوع ولا الشهر، غادي تكون واقيلا اول مرة تتحط قدام عدد مهم ديال الاوراق النقدية اللي خاصك تستعملها باش تعيش تما، و اللي خاصك تستعملها بذكاء!
نصيحتي ليك هي: الله رزق و فرق كيفما بغا، يمكن تكون من عائلة ميسورة او متوسطة او فقيرة... كيفما كنتي، حاول انك ماتعيطش لداركم وسط الشهر او الاسبوع باش تقول لهم "تقاداو ليا الفلوس!". انا بغيتك تكون ذكي و عملي في تعاملك مع الفلوس، يعني من اللخر تفكر ديما بلي راك ماعندك لا الوقت لا الفلوس باش تشري شي حاجة ماعندك ما دير بيها، هادوك الفلوس اللي عندك صالحين غير للاكل، التنقل، آداء الفاتورات و صافي.
و آخر حاجة غادي نقوليك، ايلا ماقدرتيش انك تأقلم مع الوسط الجديد ديالك، راك ماتجاوزتيش الخارج عن العادي و المألوف، هادشي طبيعي. الحل هو انك، فينما تحس براسك ماشي هو هاداك، تفكر السبب علاش اصلا جيتي لهاد المدينة، و تفكر بلي راك ماغاتبقاش ديما فيها.
هذا ما كان، هادشي كامل حيت عندي امل واحد، هو انني مابغيتكمش توقعو في الاخطاء اللي ارتكبوها هاد الناس ... مع كامل متمنياتي لكم بالنجاح الدائم.
كونو فشكل!
تعليقات
إرسال تعليق