كيفاش تزيد تقتك بنفسك و تحطم الخوف اللي كايواجهك فحياتك ؟
الثقة بالنفس شي حاجة مهمة بزاف فالحياة بلا بيها غايصعاب علينا بزاف ديال الحوايج و فقدانها يقدر يتسبب في فشلنا و ضياعنا لبزاف ديال الفرص اللي ممكن تزيد بينا القدام و توصلنا لأهدافنا .
شخصيا كانشوف أن احسن طريقة تقدر تزيد بيها الثقة بالنفس هي تكون عندك واحد العلاقة زوينة مع راسك و مقدر ذاتك و تحدف كاع الافكار السلبية اللي واخد على راسك ...
فنظرك شخص في صراع مع ذاتو واش غاتكون عندو ثقة بالنفس ؟؟ بالطبع لا الثقة بالنفس كاتعني انك كاتيق فراسك كتآمن بذاتك واخا يكون العالم كامل ضدك ! و أيضا من الحوايج اللي غايزيدوك ثقة بنفسك هو تحقق انجازات فحياتك كيفما بغات تكون واخا تكون غير صغيرة تحقق حوايج اللي غايخليوك تفتخر بنفسك تحس بأنك درتي شي حاجة و كلما حققتي حوايج جداد كلما تقتك بنفسك غاتزاد ..
و نصيحة اخرى ايلا بغيتي فعلا تزيد ثقتك بنفسك خاص تكون عندك الجرأة تجاوز المخاوف ديالك و أي حاجة كاتخوفك تجرأ و ديريها (هذا فحد داتو انجاز) .. و ديما خرج من منطقة الراحة ديالك بمعنى هادوك الحوايج اللي كاتحس فيهم أنك مضطرب نفسيا و مامرتاحش هوما اللي دير حيت هوما الحوايج اللي خاصك طور فراسك كيجيك فيهم الخوف اذن خصك الخدمة باش يوليو بجيوك عادي، ايلا كنتي دائما كاتبحت غير على المواقف ولا اللحظات ولا الاماكن ... اللي كاتحس فيهم بالراحة ديالك غاتبقا دائما فنفس النيفو إذن ايلا جاتك شي فرصة باش ديباسي راسك ماضيعهاش.
نعطيك شي حوايج اللي تقدر ديرهم في حياتك اليومية اللي غايساعدوك باش تزيد تقتك بنفسك :
- مثلا تكون غادي فطريق يبان ليك شي شخص ولا مثلا دخل لشي محل و تيسول على الساعة ولا على شي بلاصة ولا تناقش شي موضوع مع شي واحد ماكاتعرفوش .. بهاذ الطريقة غاتكسر داك الخوف من الاخر الخوف من شخص غريب عليك.
- كيف قلت قبل دير الحوايج اللي كتخاف ديرهم و ماكاتحسش براحتك مني ديرهم ناخدو كمثال كاتخاف تشارك في القسم و ماكاتقدرش تلقي عروض ولا مثلا ماكاتقدرش تمشي لشي بلاصة بوحدك إلا ايلا كان معاك شي حد .. يعني شي حوايج كيخوفوك انت عارفهم .. بحال هاذ الحوايج تجرأ وديريهم واخا تموت من الخوف و هاذي من احسن الطرق باش طور ذاتك و تزيد ثقتك بنفسك.
- بدا تقرا كتب على تطوير الذات غايغيرو ليك نظرتك للحياة و غايحلو عينيك على بزاف ديال الحوايج و ايلا كنتي من النوع اللي ماكيقراش اليوتوب هو الحل فيه أي حاجة بغيتيها ماتبحتش غير على التفاهة قلب على الحوايج اللي يطورو شخصيتك.
- حط أهداف فحياتك و تكون عندك نظرة واضحة للمستقبل ديالك.
- بعد من الاشخاص اللي كيقللو منك و الاشخاص السلبيين حيت كايكون عندهم تأثير كبير عليك.
- حتى الوضع ديال الجسد مهم بزاف و كيدل على شخصية الاخر .. مثلا مني تكون كاتمشا ماتخليش ظهرك عوج راسك مايل لتحت و حتى مني تهدر مع شي حد شوف ليه في عينيه.
- قدر ذاتك قدر ذاتك قدر ذاااااااتك....هاذي أهم حاجة .. حس بقيمة راسك حب راسك محي كاع الافكار السلبية اللي واخد على راسك .. صعيب تكون واحد الثقة بالنفس ايلا ماكانوش هاذ الحوايج لهذا هاذي اول حاجة بدا بيها ايلا فعلا بغيتي تزيد تقتك بنفسك.
تحياتي 👋
تعليقات
إرسال تعليق