الحسد
كلنا كبرنا و تربات فينا بزاف ديال الامراض النفسية .. امراض فينا و حنا براسنا ماعارفينهاش... امراض بداو من اول مرة سولونا "علاش صاحبك جاب نقطة احسن منك؟" .. من اول مرة خلاونا نقارنو ريوسنا مع غيرنا.. من اول مرة حسبو الفشل ديالنا على ظهر نجاح الاخرين.. و ما كانوش عارفين بلي كل واحد و القدرات ديالو .. كل واحد و اش عطاه الله .. كل واحد و فاش كايعطي احسن .. كل واحد و كيفاش كايبدع...
دوك المقارانات خلاونا ملي كنفشلو فتحقيف اهدافنا ، كنشوفو اهداف و نجاحات ديال الاخرين لي دايرين بينا و كتبدا تتأزم و تحقد لدرجة كتحس بالفرحة و الانتصار ملي كيفشل غيرك .. ما علموناش نقولو "بصاحتو" ، الله ينفعو برزقو، الله يبارك ليه و يزيدو..." .. علمونا نخرجو الفشل ديالنا فالنقد الهدام و السبان و الهدرة لي كاتجرح و لي كتحز فخاطر الواحد .. علمونا نحاربوا الناس الناجحين و نحاولو ما امكن نهرسو ثقتهم براسهم و نحبطوهم و نهبطوهم من الفوق للتحت.. علمونا ما نتقبلوش الناس لي مختالفين و نحاولو باش ما امكن نردوهم كايشبهو لينا...
خاص الناس لي تربات فيهم فكرة الفشل، يعرفو و يآمنو بلي ايلا كنتي "مكلخ" فحاجة وحدة ، راه كاين 100 حاجة اخرى اكيد غاتكون كاتبدع و ناجح فيها.. ما تخليش المحيط ديالك و الافكار الخامجة لي كاتحوم عليك تقنعك بلي انت ميؤوس منك.. و بلي واخا دير لي درتي عمرك ما غادي توصل... آمن براسك و شد بيديك و بدل الخطة و الطريق و الاستراتيجية و سد ودنيك من كلام الناس متسوقش البشر و غربل داك الدماغ من الأفكار السلبية لي بقات كاتراكم هاد السنين كاملها...
و اهم حاجة، نسى عليك فلان و فرتلان فين وصلو و اش دارو و شحال كايربحو و فين ولاو ساكنين و بمن تزوجو و شحال ولدو و شحال من مرة سافرو و فين مشاو و منين جاو و "علاش هوما و ماشي انت"... نسا الناس و ركز على راسك و داك المجهود لي كاتخسر على الحضية و الحقد و الحسد و السم ، جرب تجمعو و تخسرو على راسك و شوف كيف غاتوصل حتى انت.. داك لي رزقهم و سهل عليهم يوصلو راه هو سبحانه نفسه لي قادر يرزقك و يسهل عليك حتى انت ، خاصك غي تنقي خاطرك و تصفي نيتك و ما تكونش من دوك لي قال عليهم الرب العالي : 《 "في قلوبهم مرض فزادهم الله مرضا" 》.
تعليقات
إرسال تعليق